SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Student-jaslarǵa saylaw processleri boyınsha túsinikler berip ótildi

Bárshemizge belgili, usı jıldıń 27-oktyabr kúni Ózbekstan Respublikası Oliy Majlisi Nızamshılıq palatasına, xalıq deputatları wálayat, rayon hám qala Keńeslerine saylawlar bolıp ótedi. Orınlarda mine usınday áhmiyetli siyasıy processler haqqında jaslarǵa keń túsinikler beriw, úgit-násiyat ilájların shólkemlestiriw jumısları ámelge asırılmaqta. Atap aytqanda, Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında student-jaslar qatnasıwında «Saylaw nızamshılıǵı hám ámeliyat» temasında ushırasıw ótkerildi.

«Veterinariya hám zooinjeneriya» fakulteti dekanı A.Kaniyazov ilájdı ashıp berdi hám alıp bardı. Ushırasıw dawamında Berdaq atındaǵı Qaraqalpaq mámleketlik universitetiniń Yuridika fakulteti «Insan huqıqlari, mámleket huqıqı hám basqarıw» kafedrasınıń baslıǵı A.Jumanov hám usı fakultettiń student-jasları J.Abdimuratova, D.Ravshanovlar sózge shıǵıp, saylawda qatnasıw hár bir puqaranıń Konstituciyalıq huqıqıy parızı ekenligi, búgingi kúnge kelip saylaw processleri jáne de liberallastırılıp atırǵanlıǵı, siyasıy partiyalardıń saylawdaǵı qatnası haqqında túsiniklerdi berip ótti.

Student-jaslarǵa saylaw huqıqı ne ekenligi, dawıs beriw tártibi, saylaw ótkeriwdiń tiykarǵı principları hámde áyne kúnlerde alıp barılıp atırǵan saylawǵa tayarlıq processleri haqqında tolıq maǵlıwmatlar berilip, saylawlardı ótkeriwde ashıq hám áshkaralıq principine tiykarlanǵan halda ámelge asırıp barılıwına ayrıqsha dıqqat awdarıldı. Saylaw jaslardıń óz saylaw huqıqın ámelge asırıwı hám mámleket basqarıwında qatnasıw ushın qolay imkaniyat ekenligi atap ótilip, 27-oktyabr kúni bolıp ótetuǵın saylawda belsene qatnasıw hám watanımız keleshegi, xalqımızdıń ertengi táǵdiri ushın eń múnásip talabanǵa dawıs beriw usınıs berip ótildi.