SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Ózbek tiline mámleketlik til biyligi berilgenliginiń 35 jıllıǵı múnásibeti menen iláj ótkerildi

Búgin 18-oktyabr kúni Samarqand mámleketlik veterinariya medicinası, sharўashılıq hám biotexnologiyalar universiteti Nókis filialında Ózbek tiline mámleketlik til biyligi berilgenliginiń 35 jıllıǵı múnásibeti menen iláj shólkemlestirildi. Usı ilájda Berdaq atındaǵı Qaraqalpaq mámleketlik universitetiniń filologiya ilimleri boyınsha filosofiya doktorı (PhD) D.Abdullaev, filial basshılları, professor-oqıtıwshılar hám student-jaslar qatnastı. Dáslep, Ózbekstan hám Qaraqalpaqstan Respublikalarınıń mámleketlik gimnleri jańladı.

«Veterinariya hám zooinjeneriya» fakulteti dekanınıń jaslar menen islesiw boyınsha orınbasarı E.Seytmuratov iláj basında sózge shıǵıp, Ana tilimiz biziń dárejemizdi, ilim hám kámalatımızdı ólsheytuǵın hám kórsetip beretuǵın tárezi ekenligin, janajan Ana tilimizde barlıq milliy qádiriyatlarımız sáwleleniwi haqqında aytıp, milliy maqtanıshımız bolǵan hám babalarımızdan bizge miyras bolıp qalǵan, hámiyshe ulıǵlanǵan Ana tilimizge mámleketlik til biyligi berilgenligine 35 jıl tolıwı múnásibeti menen hámmeni shın kewilden qutlıqladı.

Bunnan soń QMUniń oqıtıwshısı D.Abdullaev sózge shıǵıp, Ana tilimiz biziń ótmishimizdi, búginimizdi hám keleshegimizdi ayna sıyaqlı kórsetip beretuǵın, milliy qádiriyatlarımızdı hám milliy ózligimizdi saqlap qalıwda áhmiyetli derek bolıp sanalıwın ayrıqsha atap ótti.

Iláj dawamında mámleketimizde ózbek tiliniń abıroyın jáne de arttırıw hám dúnyaǵa taınıtıw baǵdarında ámelge asırılıp atırǵan jumıslar hám erisilgen unamlı nátiyjelerge ayrıqsha dıqqat awdarıldı. Sonıń menen birge studentlerge biz ózimiz ushın júdá áziz bolǵan insanlar- áke hám ana sózlerin eń dáslep óz tilimizde aytqanımız, besikte jatqan paytımızda analarımızdan milliy tilimizde háyyiw tıńlap, náreste qálbimizde ana tilimizge bolǵan mehir hám sheksiz muhabbat sezimleri qáliplese baslaǵanı hámde hár birimiz ana tilimizdiń ájayip notaların júregimiz tórine mórlegenimiz. Insanlar qálbindegi eń girbińsiz arzıw-niyetlerin ana tilinde bayan etiwi haqqında tereń túsinikler berildi. Ilájdıń ádebiy bóliminde qábiletli student-jaslarımız tárepinen Ana tilimizdiń gózzalıǵın sáwlelendiriwshi ájayip qosıq qatarları aytıldı.