SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Gaz iyisinen záhárleniw jaǵdaylarınıń aldın alıw boyınsha úgit-násiyat ilájı ótkerildi

Usı jıldıń 18-oktyabr kúni Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında órt qáwipsizligi hám gaz iyisinen záhárleniw jaǵdaylarınıń aldın alıw boyınsha úgit-násiyat ilájı ótkerildi. Ilájda Nókis qalalıq Ishki isler organlarınıń jumısların muwapıqlastırıw basqarmasınıń baslıǵı, polkovnik T.Doshimbayev, Nókis kalalıq ayrıqsha jaǵdaylar bólimi aǵa inspektorı, mayor R.Raximbayev, filial basshılları, studentler hám olardıń ata-anaları qatnastı. Filial direktorı A.Esimbetov ilájdı kiris sózi menen ashıp berdi. Iláj dawamında sózge shıqqan qánigeler keyingi jıllarda mámleketimizde gaz iyisinen záhárleniw jaǵdaylarınıń aldın alıw hám tábiyiy gazden paydalanıwda qáwipsizlik qaǵıydalarına ámel qılıw boyınsha xalıqtıń arasında alıp barılıp atırǵan keń kólemli úgit-násiyat ilájları hám ámelge asırılıp atırǵan jumıslar haqqında tolıq toqtalıp óti. Jıynalǵanlarǵa xalıqtıń turaq jaylarında tábiyiy gazden durıs paydalanıw, órt qáwipsizligi qaǵıydalarına turaqlı túrde ámel etiw, gaz iyisinen záhárleniw aqıbetinde júz beretuǵın kewilsiz jaǵdaylardıń aldın alıw boyınsha tolıq túsinikler berildi.

Qánigeler tárepinen keyingi jıllar dawamında gaz iyisinen záhárleniw jaǵdayları menen baylanıslı bolǵan baxıtsız hádiyseler aqıbetinde qansha puqaralar jaraqat alıp, olardıń qanshası dúnyadan kóz jumǵanlıǵı haqqında statistikalıq maǵlıwmatlardlı keltirip ótti. Sonıń menen birge jaqında ǵana kóp qabatlı úylerde ijarada jasaytuǵın student-jaslardıń áyne usınday baxıtsız hádiyse sebepli qaytıs bolǵanı turmıslıq mısallar menen keltirip ótildi. Ijara úylerde jasap atırǵan student-jaslar usı sıyaqlı hádiyselerge biyparıq bolmay, ózlerine durıs juwmaq shıǵarǵan halda sergek bolıwǵa shaqırıldı. Iláj dawamında ata-analar hám studentler de sózge shıǵıp tema boyınsha óz pikirlerin bildirdi. Studentlerge tábiyiy gazden durıs paydalanıw hám órt qáwipsizligi qaǵıydalarına ámel qılıw boyınsha tiyisli kórsetpeler berildi. Filialdaǵı ijara úylerde jasap atırǵan studentlerdiń halınan turaqlı túrde xabar alınıp, gaz iyisinen záhárleniw jaǵdaylarınıń aldın alıw boyınsha úgit-násiyat jumısları alıp barılmaqta.