SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

«Xalıqaralıq awıl hayalları kúni» múnásip belgilendi

Usı jıldıń 15-oktyabr kúni paytaxtımızdaǵı jaslar orayı imaratında Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı tárepinen 15-oktyabr «Xalıqaralıq awıl hayalları kúni» múnásibeti menen iláj shólkemlestirildi. Usı ilájda Ózbekstan Respublikası veterinariya hám sharwashılıqtı rawajlandırıw mámleketlik komiteti baslıǵınıń mámleketlik tili boyınsha másláhátshisi M.Abdukarimova, komitettiń korrupciyaǵa qarsı ishki qadaǵalaw bólimi baslıǵı K.Kariev, Qaraqalpaqstan Respublikası veterinariya hám sharwashılıqtı rawajlandırıw komitetiniń orınbasarları, awıl xojalıǵı tarawında jemisli miynet islep kiyatırǵan hayal-qızlar, filial basshılları hámde student-jaslar qatnastı. Oqıw isleri boyınsha direktor orınbasarı Q.Atanazarov iláj basında sózge shıǵıp, keyingi jıllarda mámleketimizde awıl xojalıǵı tarawında ámelge asırılıp atırǵan jedel reformalar, jańalanıwlar hám erisilgen unamlı nátiyjeler hámde bul processlerdi ámelge asırıwda insan qádiri hám máplerin támiyinlewge ayrıqsha itibar qaratıp atırǵanlıǵı haqqında toqtaldı. Iláj dawamında sózge shıqqan miymanlar awıl xojalıǵı tarmaǵınıń bunnan bılayda joqarı dárejede rawajlanıwı, xalıqtı sapalı awıl xojalıǵı ónimleri menen támiyinlew hám awıllarda jasap atırǵan zamanlaslarımızdıń turmıs tárizin jáne de jaqsılaw, párawanlıǵın arttırıwda salmaqlı úles qosıp kiyatırǵan awıl hayallarınıń tózimi hám kúsh-jigeri maqtawǵa arzıydı. Sonıń menen birge awıl xojalıǵı tarawında jemisli miynet etip kiyatırǵan hayal-qızlar mámleketimiz tárepinen múnásip sıylıqlanıp kiyatırǵanlıǵı ayrıqsha atap ótildi.

–Awılda jasap, hadal miynet islep kiyatırǵan hayallardıń jámiyettegi ornın kórsetiw, olardıń usınısların úyrenip, mashqalaların unamlı sheshiwge itibar qaratıw, belsene hám iygilikli baslamalardı ilgeri súretuǵın hayallardı múnásip tárizde xoshametlep barıw búgingi kúnde júdá áhmiyetli másele— deydi —komitet baslıǵınıń mámleketlik tili boyınsha másláhátshisi M.Abdukarimova.

Ashıq kewil hám ápiwayı, pidáyılıq tımsalı bolǵan, awıllarımızdıń abadanlıǵı hám shańaraqlarımızdaǵı dasturxanımızdıń mol-molaqay bolıwına óziniń úlesin qosıp kiyatırǵan awıl hayalları hár dayım húrmet hám itibarda ekenligi atap ótildi. Iláj dawamında bayram múnásibeti menen awıl xojalıǵı tarawında kóp jıllardan berli jemisli miynet islep kiyatırǵan hayal-qızlar hámde filialdıń bir topar jumısshı hayalları pidáyı xızmetleri ushın Ózbekstan Respublikası veterinariya hám sharwashılıqtı rawajlandırıw mámleketlik komiteti tárepinen minnetdarshılıq hám estelik sawǵaları menen sıylıqlandı. Saltanatlı sıylıqlaw máresimi óz juwmaǵına jetkennen keyin jıynalǵanlarǵa Ózbekstan mámleketlik filarmoniyası Qaraqalpaqstan Respublikası bóliminiń belgili qosıqshıları qatnasıwında koncert baǵdarlaması qoyıp berildi. Elimiz súygen kórkem óner wákilleriniń atqarıwındaǵı shoq qosıqlar hámmege bayram keypiyatın inám etti.