SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Awıl xojalıǵı hayallarına bayram keypiyatı bólisildi

Dúnyada 2008-jıldan berli 15 oktyabr sánesi — «Xalıqaralıq awıl hayalları kúni» sıpatında keń túrde belgilenip kelinbekte. Usı sáne múnásibeti menen Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı direktorı A.Esimbetov Qaraózek rayonındaǵı «Qoybaq» awıl puqaralar jıyını aymaǵındaǵı awılda bolıp, awıl hayalları menen ushırastı. Sapar dawamında usı aymaqta jasap, miynet qılıp kiyatırǵan kem támiyinlengen shańaraqlardaǵı hayal-qızlardıń halınan xabar alınıp, bayram qutlıqlawları bildirildi. Sonıń menen birge, olarǵa azıq-awqat ónimleri berildi. Alıp barılǵan mazmunlı sáwbetlesiw dawamında keyingi jıllarda awıl xojalıǵı tarawına qaratılıp atırǵan úlken itibar, xalıqtı sapalı awıl xojalıǵı ónimleri menen támiyinlewde hámde awıl xojalıǵı aymaqlarınıń rawajlanıwında awıl hayallarınıń ornı girewli ekenligi atap ótildi.

Ashıq hám ápiwayı awıl hayalları bayram qarsańında ózlerine kórsetilgen bunday itibar ushın shın kewilden minnetdarshılıq bildirdi. Ápiwayı awıl turmısında jasap, hadal miynet islep ırısqısın tawıp kiyatırǵanusı sıyaqlı hayallar hár bir qızǵa órnek bolsa arzıydı. Olardıń júzlerindegi ájimlerde ómirdiń shiyrın hám ashshı táshwishleri sáwlelengen.

— Bayram múnásibeti menen olarǵa azǵana bolsa da joqarı keypiyat bólise alǵan bolsaq iygilikli maqsetimizge jetken bolamız —deydi A.Esimbetov. Filialda Xalıqaralıq awıl hayallarıbayramı múnásibeti menen ilájlar dawam etedi.