SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Ataqlı jazıwshı hám shayırlar menen bir kún

Áyne kúnlerde elimizdegi Joqarı oqıw orınlarında «Máripat taratıp» joybarı sheńberinde ataqlı jazıwshı hám shayırlar menen ushırasıwlar ótkerilip, joybar sheńberinde túrli qızıqlı ilájlar shólkemlestirilmekte. Usı jıldıń 7-oktyabr kúni Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında da usı joybar sheńberinde bir qatar ilájlar shólkemlestirildi. Qaraqalpaqstan xalıq jazıwshısı, belgili jurnalist Orazbay Abdurahmanov, Ózbekstanda xızmet kórsetken mádeniyat xızmetkeri, Qaraqalpaqstan xalıq shayırı Rustam Musurmon, ájayip shayıra Zebo Mirzo filialda sıylı miyman boldı. Filial basshılları tanıqlı dóretiwshilerdi húrmet penen qarsı alıp, ashıq sáwbetlesiw alıp barıldı. Sáwbetlesiw dawamında olarǵa filial turmısı haqqında maǵlıwmatlar berip ótildi. Májilisler zalında bolsa dóretiwshiler hám student-jaslar ushırasıwı shólkemlestirildi.

Filial direktorı ushırasıwdı kiris sózi menen ashıp berip, búgingi ilájdıń qanshelli dárejede úlken áhmiyetke iye ekenligi hám jaslar mánawiyatın jáne de joqarılatıwda áhmiyetli orın tutıwı haqqında toqtaldı. Ushırasıw dawamında Qaraqalpaqstan xalıq jazıwshısı, belgili jurnalist Orazbay Abdurahmanov, Ózbekstanda xızmet kórsetken mádeniyat xızmetkeri, Qaraqalpaqstan xalıq shayırı Rustam Musurmon, ájayip shayıra Zebo Mirzo sózge shıǵıp, búgingi kúnde elimizde ádebiyatımızdı, mánawiyatımızdı jáne de joqarılatıw barısında ámelge asırılıp atırǵan jumıslar, jaslar qálbinde milliy ádebiyatımızǵa bolǵan mehir-muhabbatın jáne kúsheytiw maqsetinde respublikamız boylap shólkemlestirilgen «Máripat taratıp» joybarınıń áhmiyeti haqqında sóz etildi. Ushırasıw dawamında student-jaslar menen ashıq sáwbetlesiw alıp barıldı, qahramanlarımız ózleriniń dóretiwshilik hám ómir tájiriybelerin ortaqlastı. Ushırasıw sheńberinde shayıra Zebo Mirzo Qaraqalpaqstan Respublikası Nókis qalalıq mektepke shekemgi ham mektep bilimlendiriw bólimine qaraslı 33-sanlı ayrım pánleri tereńlestirilip oqıtılatuǵın klassları bar ulıwma orta bilim beriw mektebinde bolıp, ol jerde bilim alıp atırǵan oqıwshılar menen sáwbetlesti. Ushırasıwlardan keyin joybar sheńberindegi ilájlarǵa start berildi.

Atap aytqanda dóretiwshilerimiz Rustam Musurmon hám shayıra Zebo Mirzo filial direktorı Adilbay Esimbetov penen birgelikte filial átirapına jaqsıniyetler menen terek nállerin otırǵızdı. Álbette bunday iygilikli baslamalar jaslarǵa jaqsı órnek boladı dep oylaymız. Student-jaslarımız shayırlardıń dóretiwshiligi menen jáne de jaqınnan tanısıw ushın «Zakovat» intellektuallıq oyını ótkerildi. Onda qatnasıwshı komandalar qahramanlarımızdıń dóretiwshilik iskerliginen dúzilgen qızıqlı sorawlarǵa juwap izledi.

Sonıń menen birge ziyrek studentler qatnasıwında “Munozara” debat oyını ótkerildi. Ilájlar óz juwmaǵına jetkennen soń miymanlar ushın dasturxan jayılıp, palaw pisirildi. Shay ústinde ashıq sáwbetlesiw alıp barıldı. Búgingi ilájdıń juwmaqlawshı bóliminde bolsa miymanlar hám student-jaslar jaǵılǵan ot átirapında jám bolıp, qosıq, ádebiyat haqqında unamlı pikirler bildirildi. Filial direktorı A.Esimbetov miyman dóretiwshilerge búgingi saparı ushın ayrıqsha minnetdarshılıq bildirip, filial basshılları tárepinen húrmet jarlıǵı tapsırdı. Olar da sózge shıǵıp, ózlerine kórsetilgen húrmet-itibar ushın raxmet aytıp, filial atmosferası olarǵa unaǵanı hám Tashkentke unamlı tásirler menen qaytıwın ayrıqsha atap ótti. «Máripat taratıp» joybarı sheńberinde shólkemlestirilgen ilájlar student-jaslar qálbinde ájayip elesler menen mórlendi.