SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Filialǵa 1-kursqa qabıl etilgen studentlerge simvolikalıq gilt hám studentlik gúwalıǵı tapsırıldı

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında “Studentlikke baǵıshlaw” atamasında saltanatlı ilajı ótkerildi. Usı ilájda filial basshılları, Qaraqalpaqstan Respublikası veterinariya hám sharwashılıqtı rawajlanıdırıw komiteti baslıǵınıń orınbasarı Q.Pirnazarov, professor-oqıtıwshılar hám student-jaslar qatnastı. Dáslep, Ózbekstan hám Qaraqalpaqstan Respublikalarınıń mámleketlik gimnleri jańladı. Filial direktorı, professor A.Esimbetov ilájdı kiris sózi menen ashıp berip, keyingi jıllarda mámleketimizde joqarı bilimlendiriw tarawında úlken ózgerisler hám jańalanıwlar júz berip, jaslarǵa sapalı bilim beriw baǵdarında izshil jumıslar ámelge asırılıp kiyatırǵanlıǵı haqqında toqtaldı.
– Watanımızdıń rawajlanıwı, úlken maqsetlerimiz hám iygilikli arzıwlarımızdıń ijabatın biz eń aldı menen siz jaslardıń ǵayratı hám anıq háreketlerinen kóremiz. Jaqın keleshekte óz qánigeligińiz boyınsha jetik kadr bolıp, úlken jetiskenliklerge erisiwińizge, elimiz abıroyın joqarı basqıshlarǵa alıp shıǵıwda úles qosıwıńızǵa isenimim kámil – dedi filial direktorı, professor A.Esimbetov. Iláj miymanları da sózge shıǵıp, 2024-2025-oqıw jılında 1-kursqa qabıl etilgen student-jaslardı qızǵın qutlıqlap, olarǵa keleshekte tabıslar tiledi.

Sonıń menen birge, Húrmetli Prezidentimizdiń iygilikli baslaması menen qaraqalpaqstanlı jaslarǵa keń múmkinshilikler jaratılıp berilip atırǵanlıǵı, bir ǵana joqarı bilimlendiriw tarawın alıp qaraytuǵın bolsaq, 2022-jıl 31-avgusttaǵı 213-sanlı Prezident pármanı menen bıyılǵı jılda da respublikamızdıń qala hám rayonları ushın zárúr bolǵan mamanlıqlar sanınan hám kadrlardıń ishki mútájliklerinen kelip shıǵıp, 10 mıń qosımsha kvota ajıratılıp, mıńlaǵan jaslarǵa jańa úmit hám motivaciya baǵıshlaǵanı hám usı kvota tiykarında filialǵa jámi 14 student oqıw qabıl etilgenligi ayrıqsha atap ótildi. Ilájdıń kulminaciyalıq noqatında, filialǵa usı jılı 1-kursqa qabıl etilgen student-jaslarǵa filialdıń simvolikalıq gilti hám studentlik gúwalıǵın tapsırıw máresimi bolıp ótti.

Joqarı ball tiykarında studentlikke usınıs etilgen jaslar studentlik gúwalıǵın qabıl etip aldı. Studentlik kúndeligin endi ǵana paraqlap, oǵan unamlı esteliklerdi jazıp baslaǵan jaslar ushın bul iláj shın mánisinde xoshkeypiyat baǵıshladı. Saltanatlı studentlik gúwalıǵın tapsırıw máresimi óz juwmaǵına jetkennen soń koncert baǵdarlaması qoyıp berildi. Onda Ózbekstan mámleketlik filarmoniyası Qaraqalpaqstan Respublikası bólimi qosıqshıları ózleriniń shoq qosıqları menen jıynalǵanlarǵa xosh keypiyat inám etken bolsa, filialdıń qábiletli student-jaslarınan dúzilgen «Qarekenshe online» komandasınıń aǵzaları atqarıwındaǵı ájayip ayaq oyınlar hám studentlik dáwirin súwretlep beretuǵın qızıqlı shıǵıwlar haqıyqıy bayram atmosferasın jaratıp bere aldı.