SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Kásip bayramı qarsańında oqıtıwshılar ushın múnásip bayram ilájı shólkemlestirildi

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında1-oktyabr – «Muǵallimler hám ustazlar kúni» múnásibeti menen bayram ilájı shólkemlestirildi. Qaraqalpaqstan Respublikası veterinariya hám sharўashılıqtı rawajlanıdırıw komiteti baslıǵınıń orınbasarı Q.Pirnazarov, filial basshılları, professor-oqıtıwshıları hámde student-jasları qatnasqan usı iláj basında Ózbekstan hám Qaraqalpaqstan Respublikalarınıń mámleketlik gimnlerijańladı. Filial direktorı, professor A.Esimbetov iláj basında sózge shıǵıp, oqıtıwshılıq dańqlı kásip ekenligin hámmemiz júdá jaqsı biliwimiz, bul dańqlı kásip iyelerin qansha húrmetlesek, sonshama az túyiliwi, olardıń jelkesinde keleshegimiz iyeleri bolǵan jas áwladtı tárbiyalaw sıyaqlı áhmiyetli bir wazıypa turǵanın ayrıqsha atap ótti. Iláj dawamında sózge shıqqanlar, keyingi jıllarda mámleketimizde oqıtıwshılardıń nátiyjeli miynetleri múnásip bahalanıp, olardıń abıroyın jáne de asırıw boyınsha alıp bapılıp atırǵan iygilikli jumıslar haqqında toqtaldı. Húrmetli Prezidentimizdiń óz shıǵıp sóylewleriniń birinde «Muǵallimniń abıroy-itibarı bolsa bul millettiń, pútkil xalıqtıń abıroy-itibarı-dep atap ótken edi. Haqıyqatında da hár birimizdiń óz kásibimizdiń jetik qánigesi bolıp, jámiyette óz ornın tabıwımızda olardıń xızmeti ullı. Insan qanday mártebe hám dárejege erispesin, ol álbette mektepte ápiwayı muǵallimnen bilim alǵan boladı. Ilajdıń kulminaciyalıq noqatında bolsa filialdajemisli miynet etip atırǵan bir qatar professor-oqıtıwshılar Ózbekstan Respublikası Aўıl xojalıǵı ministrligi tárepinen minnetdarshılıq hámde filial basshılları tárepinen húrmet jarlıǵı hám sawǵalar menen sıylıqlandı. Sonıt menen birge, sáne múnásibeti menen filial kásiplik awqamı tárepinen professor-oqıtıwshılar hám xızmetkerler ortasında ótkerilgen
«Zakovat» intellektuallıq oyınındajeńimpaz bolǵan komandalarǵa diplom hám sawǵalar tapsırıldı. Sıylıqlaw máresimi óz juwmaǵına jetkennen soń koncert baǵdarlaması qoyıp berildi. Onda Ózbekstan mámleketlik filarmoniyası Qaraqalpaqstan Respublikası bólimi qosıqshıları ózleriniń shoq qosıqları menen jıynalǵanlarǵa xosh keypiyat inám etken bolsa, filialdıń qábiletli student-jaslarınan dúzilgen «Qarekenshe online» komandasınıń aǵzaları atqarıwındaǵı ájayip ayaq oyınlar hám qızıqlı shıǵıwlar haqıyqıy bayram atmosferasın jaratıp bere aldı.