SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Filialǵa bilim alıw ushın kelgen studentler jataqxana menen támiyinlendi

Bárshemizge belgili búgingi kúnde joqarı oqıw orınlarında bilim alıp atırǵan student-jaslardı turaq jay menen támiyinlew máselesine ayrıqsha itibar qaratılıp, usı sistemanı jetilistiriw boyınsha zárúr is-ilájlar alıp barılmaqta. Ásirese, jańa oqıw jılınıń baslanıwı qarsańında alıs wálayatlardan hám rayonlardan studentler paytaxtqa bilim alıw ushın kelip, studentler turaq jayı hám ijara úylerge jaylasadı.

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında bul máseleni hár tárepleme unamlı sheshiw ushın tiyisli juwapkerler tárepinen kerekli jumıslar alıp barılmaqta. Filial direktorı A.Esimbetov bul process penen jaqınnan tanısıw hám isenim kámil etiw maqsetinde studentler ushın jaratılǵan sharayat hám qolaylıqlardı kózden ótkerdi. Studentler turaq jayındaǵı jaslar menen ashıq sáwbetlesiw alıp barıp, pikir hám usınısların tıńladı.

Studentler ózleri ushın jaratıp berilgen sharayatlardan tolıq qanaatlanǵanın atap ótti. Direktor sáwbetlesiw dawamında áyne kúnlerde 6 qabattan ibarat 400 orınǵa mólsherlengen jataqxana qurılısına jaz máwsiminde start berilip, process dawam etip atırǵanın ayrıqsha atap ótti. — Studentlerdi turaq jay menen támiyinlew hám zárúr qolaylıqlardı jaratıwǵa háreket etemiz, eger sizler hám ata-anańız jasaw sharayatıńızdan kewili tolsa bizler de qáterjam bolamız — deydi Adilbay Esimbetov.
Maǵlıwmat ornında, filial studentler turaq jayı jámi 78 orınǵa mólsherlengen bolıp, házirgi waqıtta 32 er bala hám 46 qız jaylastırılǵan. Sonı atap ótiw orınlı, usı processlerdiń ádalatlı tárizde ótiwi qatań túrde qadaǵalawǵa alındı.