SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Filialda jańa oqıw jılına start berildi

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında «Biz bir bolsaq – bir xalıqpız, birlessek –Watanbız!» degen súren tiykarında 2024-2025-oqıw jılına start berildi. Jańa oqıw jılınıń ashılıw máresiminde dáslep Ózbekstan hám Qaraqalpaqstan Respublikalarınıń gimnleri jańladı. Ilájda Qaraqalpaqstan Respublikası Veterinariya hám sharwashılıqtı rawajlandırıw komitetiniń baslıǵı M.Qaypanov, professor-oqıtıwshılar, studentler hámde olardıń ata-anası qatnastı.

Jańa oqıw jılınıń ashılıw máresiminde filial direktorı, professor A.Esimbetov shıǵıp sóylep, bárshe qatnasıwshılardı jaqında xalqımız úlken shadlıq penen belgilegen Ózbekstan Respublikası Ǵárezsizliginiń 33 jıllıǵı múnásibeti hámde studentlik baxıtına miyassar bolǵan studentlerdi qızǵın túrde qutlıqladı. Student-jaslarǵa jańa oqıw jılında jańa shıńlarǵa jetiw, joqarı nátiyjelerge erisip, belsene studentler qatarınan orın alıwın tiledi. Iláj dawamında sózge shıqqanlar mámleketimizde ásirese keyingi jıllarda joqarı bilimlendiriw sistemasında alıp barılıp atırǵan jedel reformalar, tálim sapasın jaqsılaw jónelisinde júz berip atırǵan ózgerisler haqqında ayrıqsha toqtalıp ótti.

Húrmetli Prezidentimdiń ǵamxorlıǵı menen usı jılda da tek ǵana qaraqalpaqstanlı jaslar ushın ayrıqsha kvotalardıń ajıratılıwı ótken jılǵı sıyaqlı jáne mıńlaǵan jaslarǵa úlken motivaciya baǵıshlawı ayrıqsha atap ótildi. Sonday-aq, ilájda joqarı ball toplap 1-kursqa qabıllanǵan studentler hám olardıń ata-anaları sózge shıǵıp, perzentleriniń sapalı bilim alıwı ushın mámleketimiz tárepinen jaratıp berilip atırǵan keń múmkinshilikler ushın óz minnetdarshılıǵın bildirdi. Qálbindegi eń girbińsiz arzıwları ámelga asıp, studentlik qatarına qabıl etilgen jaslar sapalı bilim alıwǵa tayar halda jańa oqıw jılın baslap aldı. Olar keleshekte mámleketimizdiń rawajlanıwına úles qosatuǵın jetik hám zamanagóy kadrlar bolıwına isenim bildiremiz. Iláj koncert baǵdarlaması menen dawam etti.