Direktordıń bayram qutlıqlawı: 33 jasıń múbárek janajan Ózbekstanım!
Áziz zamanlaslar! Mine qálbimizdi maqtanısh hám quwanısh penen toltıratuǵın áyyamımız esik qaǵıp turıptı. Eń dáslep, ǵárezsizligimizdiń 33 jıllıq saltanatına bárshemizdi jáne bir márte saw-salamatlıqta jetkizgenine mıń shúkirler bolsın! Haqıyqatında da bul bayram hámmemiz asıǵıp, talpınıp kútetuǵın eń ullı hám eń úlken áyyamımız bolıp esaplanadı. Usı qısqa waqıt ishinde mámleketimizde ámelge asırılǵan keń kólemli reformalar, ósiw hámde ilgerilewlerdiń gúwası bolıp kelmektemiz. Ǵárezsiz Ózbekstan rawajlanıw jolınan barmaqta.
Bir ǵana bilimlendiriw tarawın alıp qaraytuǵın bolsaq, sońǵı jıllarda ámelge asırılıp atırǵan reformalar student jaslar ushın keń imkaniyat esiklerin ashıp bermekte. Keleshegimiz iyeleri bolǵan jaslar tálimine bolǵan bunday joqarı itibar álbette óziniń unamlı nátiyjesin beriwi anıq. Joqarı bilimlendiriw tuwralı sóz etilgende sonı ayrıqsha atap ótiw júdá orınlı, Húrmetli Prezidentimizdiń itibarı menen qaraqalpaqstanlı jaslarǵa bıyılǵı jılda jáne 10 mıń qosımsha kvotalar ajıratılıwı, yaǵnıy jaslar ushın 6500 kvotadan basqa jáne tólemli kontrakt tiykarında 3500 qosımsha kvota ajıratılıp, jaslardıń joqarı oqıw orınlarına student bolıwın támiyinlew boyınsha tapsırma beriliwi qaraqalpaqstanlı jaslar ushın, onnan qalaberse bizler ushın úlken motivaciya berip, bilimlendiriw tarawın jáne de rawajlandırıwǵa úles qosıwday juwapkershiligimizdi ele de arttıradı. Ótken jılı da Mámleketimiz Basshısınıń iygilikli baslaması menen mıńlaǵan qaraqalpaqstanlı jaslarǵa student bolıwday úlken baxıt inám etilip, olardıń kózleri quwanıshtan jarqırap, qálbi shın mánisinde minnetdarshılıq hám shúkirshilik sezimlerine bólengen edi.
Húrmetli Prezidentimizdiń mine usınday ǵamxorlıǵı joqarıda atap ótken sózlerimizdiń ayqın mısalı bola aladı. Bizlerge kórsetilgen bunday ayrıqsha itibardan qálbimiz sheksiz maqtanıshqa tolıp, inám etilip atırǵan bir qatar imkaniyatlardan únemli paydalanǵan halda jaslarǵa múnásip tálim beriwge háreket qılamız. Pidayı hám jankúyer professor-oqıtıwshılarımız keleshek iyelerine jaqsı bilim beriwge hám zaman menen teń qádem basıwǵa umtıladı. Bul ullı bayramǵa jaqınlarımız benen birgelikte aman-esenlikte jetkizgenliginiń ózi bizge inám etilgen sawǵa dep oylayman.
Pursattan paydalanıp, respublikamız xalqın, filialımız jámáátin hámde áziz student jaslardı Ózbekstan Respublikası Ǵárezsizliginiń 33 jıllıq bayramı menen qızǵın qutlıqlayman! Elimizdiń tınıshlıǵına kóz tiymesin!Aspanımız ashıq bolsın! Hár birimizdiń qálbimizde mudamı tınıshlıq qosıǵı jańlap tursın!
Kóshelerimiz baxıtlı adamlar menen tolıptasıp, hár bir demimiz shadlıqqa bay bolsın! Ilayım, kekselerimizdiń pátiyaları
qabıl bolıp, elimizdiń paraxatshlıǵına kóz tiymesin.
Hámmeńizge saw-salamatlıq tilep qalaman! Jaqsı kúnlerde diydar kórisiw nesip etsin! Jáne bir márte bayram múbárek bolsın!
Húrmet penen, filial direktorı,
Biologiya ilimleri doktorı,
professor Esimbetov Adilbay Tlepovich
скачать dle 12.1
Telefon
E-mail
