SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Filialdıń miynet jámááti Moynaq rayonına párwaz etti

Búgin Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń miynet jámááti ishki turizmdi rawajlandırıwǵa úles qosıw maqsetinde Moynaq rayonına sayaxat qıldı. Filial jámááti Nókis xalıqaralıq aeroportınan gezektegi reys penen Moynaq rayonına párwazdı ámelge asırdı. Olar tabıslı párwazdan keyin Moynaq aeroportına qondı hám mánzil boylap sayaxatqa start berildi. Birinshi mánzil ashıq aspan astındaǵı kemeler muzeyi kompleksi boldı.

«Kemeler qábirstanı» na sayaxat dawamında ol jerdegi 15 ke jaqın kemeler kórgizbesin óz kózleri menen kórip, usı tat basqan kemeler Aral apatshılıǵın shın mánisinde súwretlep beredi degen táriyp biykarǵa berilmegenine gúwa boldı. Moynaqqa keletuǵın kóplegen sayaxatshılarda ájayip tásirlerd qaldıratuǵın bul mánzilden keyin filial jámááti sayaxatshılar arasında belgili bolǵan jáne bir mánzil tárepke qaray jol aldı.

Aral teńiziniń ótmishi hám tariyxın sáwlelendiriwshi Aral teńizi tariyxı muzeyine barıp, bul jerdegi eksponatlar menen jaqınnan tanıstı. Muzey xızmetkerleri miymanlardı jıllı kútip alıp, Aral teńizi tariyxı hám muzeydegi eksponatlar haqqında qızıqlı maǵlıwmatlardı berip ótti. Sayaxatshılarımız Aral teńizi tariyxına tiyisli hújjetli filmdi tamasha etip, jáne de keńlew tásirlerge iye boldı. — Moynaq boylap sayaxatımız dawamında bul jerdegi dıqqatqa ılayıq jerler menen jaqınnan tanısıp, unamlı tásirlerge iye boldıq—deydi fakultet dekanı A.Kaniyazov—sonday-aq, Nókisten Moynaqqa birinshi márte párwazdı ámelge asırǵanımız da bizge jarqın demlerdi inám etti.
Filial jámááti qatnasıwında Moynaq rayonına shólkemlestirilgen sayaxat qızıqlı tásirlerge bay boldı.