SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Pitkeriwshi jaslar «Veterinar antı»n qabıl etti

Usı jıldıń 20-iyul kúni Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında «Haq jol Sizge, pitkeriwshi!» súreni tiykarında pitkeriwshilerge diplom tapsırıw hám «Veterinar antı»n qabıl etiw máresimi bolıp ótti. Ilájda filial basshılları, Qaraqalpaqstan Respublikası Veterinariya hám sharwashılıqtı rawajlandırıw komitetiniń wákilleri, ata-analar, professor-oqıtıwshılar hám pitkeriwshi student-jaslar qatnastı. Filial direktorı, professor Adilbay Esimbetov sózge shıǵıp, jańa shıńlarǵa qaray qádem taslap atırǵan pitkeriwshi jaslardı qızǵın túrde qutlıqlap, olardıń 4 jıl dawamında qolǵa kirgizgen tabısların maqtanısh penen tilge alıp, ayrıqsha atap ótti.
—Mine búgin hámmeńiz úlken ómir, jańa imkaniyatlarǵa qaray qádem qoyıp atırsız—deydi direktor A.Esimbetov—sizlerge aytar keńesim, hámiyshe óz bilimińizge tayanıń, joqarı intellekt, zamanagóy pikirlew hám jetik bilim siziń keleshektegi obrazıńızdı jaratıp beredi.
Bunnan soń ilájdıń kulminaciya noqatı jetip keldi hám «Veterinar antı»n qabıl ettiw máresimi ótkerildi. Veterinariya medicinası qánigeliginiń pitkeriwshi jasları saltanatlı túrde «Veterinar antı»n qabıl etip, óz kásibine sadıq xızmet qılıwǵa wáde berdi. Mine usınday tolqınlanıwlarǵa bay pursatlarda bayram ilájına miyman sıpatında kelgen ata-analar sózge shıǵıp, perzentlerine bilim hám tárbiya bergen filial professor-oqıtıwshılarına minnetdarshılıq bildirip, bárshe pitkeriwshilerge haq jol tiledi.

Bunnan soń filialdıń belgili «Qarekeńshe online» komandasınıń aǵzaları bolǵan pitkeriwshi jaslar ayrıqsha atap ótilip, olarǵa filial ushın islegen qalıs xızmetleri ushın tereń minnetdarshılıq bildirildi. Áyne usı komanda qatnasıwında ájayip koncert baǵdarlaması qoyıp berildi. Iláj juwmaǵında bolsa, pitkeriwshilerge diplomlar saltanatlı túrde tapsırıldı. Maǵlıwmat ornında, bıyılǵı oqıw jılında 5 qánigelik boyınsha jámi 356 student qánigeligi boyınsha diplomǵa iye boldı. Usı sanlar filial tariyxındaǵı birinshi eń kóp pitkeriwshiler bolıp tariyxımızǵa mórlenip qaladı.