SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Yaponiya xalıqaralıq birge islesiw shólkemi (JICA) missiyası wákilleri menen birge islesiw jolǵa qoyıladı

Áyne kúnlerde Yaponiya xalıqaralıq birge islesiw shólkemi (JICA) missiyası wákilleri ámeliy sapar menen Ózbekstanda bolıp turıptı. Kúni keshe delegaciya wákilleri Nókis qalasını kelip, Qaraqalpaqstan Respublikası Veterinariya hám sharwashılıqtı rawajlandırıw komiteti wákilleri menen ushırastı. Búgin, yaǵnıy 18-iyul kúni Samarqand mámleketlik veterinariya medicinası, sharwashılıq hám biotexnologiyalar universiteti Nókis filialına Yaponiya xalıqaralıq birge islesiw shólkemi (JICA) missiyası baslıǵınıń orınbasarı Nagino Ai keldi.

Dáslep, filialdıń direktor orınbasarları Q.Atanazarov hám R.Turganbaev penen sáwbetlesiw alıp bardı. Ushırasıw dawamında eki tárepleme birge islesiwdi jolǵa qoyıw, birgelikte iri joybarlardı ámelge asırıw, veterinariya hám sharwashılıq boyınsha birge islesiwdi ámelge asırıw sıyaqlı qatar máseleler dodalandı. Alıp barılǵan sáwbetlesiwden keyin Yaponiyalı miyman filial professor-oqıtıwshıları hám ilimiy bólim xızmetkerleri menen ushırasıp, óz-ara sáwbetlesiw alıp bardı.

Sóylesiwler dawamında tiykarınan veterinariya tarawı boyınsha sheriklikte iri joybarlardı ámeliyatqa engiziw, Qaraqalpaqstan Respublikasındaǵı sharwashılıq tarmaqları menen jaqınnan tanısıw hám jańa ideyalardı ilgeri súriw máselelerine dıqqat awdarıldı. Paydalı usınıslar bildirilip, áhmiyetli máseleler boyınsha pikir almasıldı. Sapar sheńberinde Nagino Ai filialda studentler ushın jaratılǵan sharayatlarǵa qızıǵıwshılıq bildirip, oqıw xanaları, vivariy hám oqıw- laboratoriyaları menen jaqınnan tanıstı. Yaponiyalı miymanǵa filialdaǵı oqıw processi, laboratoriya xanalarınıń zárúr bolǵan zamanagóy ásbap-úskeneler menen támiyinlengenligi boyınsha maǵlıwmatlar berildi. Filialda bolıp ótken ushırasıw hár eki tárep ushın da paydalı boldı. Maǵlıwmat ornında, Yaponiya xalıqaralıq birge islesiw shólkemi (JICA) missiyası wákilleriniń Ózbekstanǵa ámeliy saparı avgust ayına shekem dawam etiwi rejelestirilmekte.