SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Birge islesiwdiń jańa basqıshlarına qádem taslanbaqta

Aldın xabar bergenimizdey, Tashkent qalasında «Jipek jolı awıl xojalıǵı bilimlendiriwi hám ilimiy-izertlew innovaciyaları Alyansı»nıń 9 jıllıq konferenciyası ótkerildi. 9-iyul kúni start alǵan iláj 11-iyulǵa shekem bolıp ótiwi rejelestirilgen edi. Sırt el joqarı oqıw orınlarınıń wákilleri hámde jergilikli wákillerdi bir jerge jámlegen iláj joqarı dárejede shólkemlestirildi. Konfrensiya sheńberinde elimizdegi JOOları hám Qıtay, Qazaqstan hám Pákistannıń awıl xojalıǵı institutları ortasında kóplegen birge islesiw memorandumları imzalandı.

Atap aytqanda, Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı konferenciyanıń ekinshi kúninde Qıtay Xalıq Respublikasınıń Yangling kásip-óner hám texnikalıq kolledji hámde Qazaqstan Respublikasınıń Semey qalasındaǵı Shakarim atındaǵı universiteti menen birge islesiw memorandumın imzalawǵa erisken edi. Búgin de sırt mámleketlerden kelgen wákiller menen sóylesiwler alıp barılıwı dawam etip, unamlı nátiyjelerge erisildi.

Yaǵnıy, filial direktorı Adilbay Esimbetov Qıtay Xalıq Respublikasınıń Shansi awıl xojalıǵı universitetiniń rektorı Liao Yuncheng hámde Pákistannıń Islamabad qalasında jaylasqan abıroylı Quaid-i-Azam universitetiniń professorı, doktor Mushtaq Ahmad QAU botanika baǵı hám gerbariy (ISL) direktorı menen alıp barılǵan sáwbetlesiw dawamında usı universitetler menen memorandum imzalawǵa eristi. Memorandum hám shártnamalardı imzalaw máresimi dawamında elimizdegi joqarı oqıw orınları hám sırt mámleketlerdiń abıroylı JOOları ortasında birge islesiw memorandumları imzalandı. Óz ornında Qazaqstan, Pákistan hámde Qıtay Xalıq Respublikası menen dúzilgen memorandumlar filial ushın birge islesiwdiń jańa basqıshların ashıp beriwge hám bilimlendiriw sapasın jáne de jaqsılawǵa xızmet qıladı dep isenim bildiremiz.