Jaslar bayramı múbárek bolsın!
Assalawma aleykum, Respublikamızdıń áziz jasları hámde qádirli filial studentleri! Úlken quwanısh hám kóterińki keypiyat penen bársheńizdi “30-iyun-Jaslar kúni” bayramı menen shın kewilden qutlıqlayman!
Húrmetli Prezidentimiz óz shıǵıp sóylewleriniń birinde jaslardı Ózbekstannıń eń úlken baylıǵı, biybaha ǵáziynesi sıpatında qádirlewin atap ótken edi. Haqıyqatında da, jaslar keleshek iyeleri sıpatında eń úlken kúsh sanaladı. Búgin mámleketimizde jaslarǵa jaratılǵan keń imkaniyatlardı kórip, olarǵa háwesim keledi. Ásirese, bilimlendiriw tarawında ámelge asırılıp atırǵan reformalar jaslarımızdıń zamanagóy bilimlerge iye bolıwın kepilleydi. Jaslardı joqarı bilimlendiriwge keń qamtıp alıw maqsetinde joqarı oqıw orınlarına oqıwǵa kiriw ushın bir qatar jeńilliklerdiń beriliwi, test sınaqlarınıń ádil tárizde ótiwine ayrıqsha itibar qaratılıp atırǵanı, sonday-aq, studentlerge jaratıp berilip atırǵan bárshe sharayatlardıń túp-tiykarında elimiz jasların hár tárepleme jetik hám ilimli etip tárbiyalaw sıyaqlı ullı maqset bar. Qaysı tarawdı alıp qaramayıq, onıń rawajlanıwında jaslardıń roli júdá áhmiyetli sanaladı.
Quwanıshlısı, olar ózlerine inám etilip atırǵan imkaniyatlardan únemli paydalanǵan halda, biyik shıńlarǵa umtılıp, unamlı tabıslarǵa erispekte. Derlik 7 jıldan berli Húrmetli Prezidentimizdiń baslaması menen elimizde 30 iyun sánesi Jaslar kúni sıpatında keń belgilenip kelinbekte.Usı bayram júdá kóterińki ruwxta bolıp ótedi. Mámleketimizde jaslarǵa degen itibar hám ǵamxorlıqtı mine usıdan da ayqın seziw qıyın emes. Ózbekstan jasları eń baxıtlı jaslardan biri dep oylayman. Sebebi, jaslardı sol dárejede ardaqlap, olarǵa imkaniyat esiklerin keń ashıp beretuǵın mine usınday tınısh watan qushaǵında ónip-ósiwdiń ózi bizge berilgen eń ullı inám. Shının aytsam, studentlerimniń arasında ózim de jasarǵanday bolaman.
Olar maǵan jáne de kúsh-ǵayrat baǵıshlaydı. Házirgi kúnde filialda jámi 1198 student-jaslar bilim alıp atırǵan bolsa, olardıń hár birinen ózine jarasa nátiyje kútemen. Óz ornında filial studentleri de berilgen imkaniyatlardan únemli paydalanıp, bir qatar unamlı nátiyjelerge ersip kelmekte. Atap aytqanda, usı oqıw jılı filial ushın júdá bereketli kelip, 4 studentimiz Ózbekstan Respublikası Prezidenti hám ataqlı stipendiya jeńimpazlarına aylandı. 3-kurs student qızımız K.Serimbetova bolsa Qazaqstan Respublikası Shımkent qalasında bolıp ótken Aziya kubogında sıylı 1-orındı alıp, altın medal iyesi boldı. Sonıń menen birge studentlerimiz túrli tańlawlarda da belsendelik kórsetti. 4-kurs studenti Sh.Qarlıbayeva «Mirzo Uluǵbek vorislari» Respublikalıq tańlawınıń rayon hám Qaraqalpaqstan Respublikası basqıshı jeńimpazı dep tabıldı hám final basqıshına jollanba alıp, belsene qatnastı.
Jıldıń eń quwanıshlı jańalıǵı jaqın kúnlerde júz berdi. Yaǵnıy, Awıl xojalıǵı ministrligi hámde «Agrar taraw hayalları» associaciyasınıń baslaması menen ministrlik sistemasındaǵı 10 joqarı oqıw orınlarınıń student-jasları arasında ótkerilgen «Jaslar hám innovaciyalıq awıl xojalıǵı» kórik-tańlawında filialımızdıń «Keleshek jasları» komandası jeńimpaz dep tabıldı hámde I dárejeli diplom hám Evropaǵa sayaxat jollanbasın qolǵa kirgizdi. Bizge mine usınday úlken tabıslardı alıp kelgen jaslarǵa sheksiz minnetdarmız. Olarǵa sapalı bilim beriwdegi maqsetimiz de áyne usıdan ibarat. Bizlerdiń jelkemizde bolajaq qánigelerge tálim hám tárbiya beriwdey úlken juwapkershilik turıptı. Keleshek iyelerine zamanagóy bilim beriwge, olardı professional bilimlendiriw sisteması tiykarında óz kásibiniń jetik qánigesi sıpatında tárbiyalaw búgingi kúnniń áhmiyetli talabı bolıp esaplanadı. Sanlarǵa júzlenetuǵın bolsaq, Ózbekstan xalqınıń 60 payızdan aslamın jaslar quraydı eken. Al filialımızda miynet etip atırǵan xızmetkerler arasında jaslar 16,3 payızdı quraydı. Mámleketimizde jaslardı hár tárepleme qollap-quwatlaw hám olardıń huqıqların qorǵaw baǵdarında is-ilájlar ámelge asırılmaqta. Bizler bulardıń gúwası bolıp, elimiz jaslarınıń ullı keleshegine úlken isenim bildire alamız.
Pursattan paydalanıp, «30-iyun-jaslar kúni» múnásibeti menen pútkil respublikamız jasların, qalaberse filialımızdıń jas kadrları hámde studentlerin ájayip bayram menen shın kewilden qutlıqlayman! Shańaraǵıńızǵa qáterjamlıq hám salamatlıq tileymen. Sizlerdey jaslardı ónip-ósirgen ata-anańızǵa sheksiz minnetdarshılıǵımdı bildiremen. Keleshek ushın úlken rejeler dúzip, úlken maqsetlerge qaray umtılıń! Bilimlerdi jaqsı ózlestiriń hám watanımızdıń rawajlanıwı ushın óz úlesińizdi qosıwǵa háreket qılıń! Hámmeńizge qálbimdegi eń girbińsiz hám iygilikli tileklerimdi jollap qalaman. Tiykarǵısı ǵayratıńız sónbesin, hámiyshe lebińizden kúlki ayırılmasın. Baxıtlı bolıń! Bayramıńız múbárek áziz jaslar!
Húrmet penen,
Esimbetov Adilbay Tlepovich
filial direktorı, biologiya ilimleri doktorı, professor
скачать dle 12.1
Telefon
E-mail
