SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

26-iyun-«Xalıqaralıq náshebentlikke qarsı gúresiw kúni»

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń májilisler zalında 26-iyun-«Xalıqaralıq náshebentlikke qarsı gúresiw kúni» múnásibeti menen úgit-násiyat ilájı ótkerildi. Usı ilájda Nókis qalalıq ishki isler organları jumısların muwapıqlastırıw basqarması, jınayat qıdırıw bólimi operativ wákili, mayor S.Allamjarov, «Veterinariya hám zooinjeneriya» fakulteti dekanı A.Kaniyazov, filial profilaktika inspektorı aǵa leytenant Q.Qayıpnazarov hám student-jaslar qatnastı.

Fakultet dekanı A.Kaniyazov ilájdı kiris sózi menen ashıp berdi hám alıp bardı. Iláj dawamında S.Allamjarov sózge shıǵıp, «ásir obası» dep táriyp beriletuǵın náshebentlikke qarsı gúres alıp barıwımız zárúrligi, usı illet salamatlıǵımızǵa hám insan keleshegine tosıq bolıwı múmkin ekenligi haqqında toqtalıp ótti.

Búgingi kúnde elimizde bul baǵdarda ámelge asırılıp atırǵan is-ilájlar haqqında aytıp berdi. Dúnya boyınsha náshebentlik zatlardı qabıl etiwshiler sanı boyınsha statistikalıq maǵlıwmatlardı keltirip, narkologiyalıq keselliklerge shatılıwdıń unamsız aqıbetlerin ayrıqsha atap ótti. Jıynalǵanlarǵa temaǵa baylanıslı sociallıq rolik qoyıp berildi. Student-jaslar kerekli maǵlıwmatlarǵa iye boldı.