SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

«Keleshek jasları» komandası Evropaǵa sayaxat jollanbasın qolǵa kirgizdi

Awıl xojalıǵı tarawında jaslardıń jańa, kreativ ideyaların qollap-quwatlaw, jańa joybarlardı ámelge asırıwı ushın motivaciya beriw, tarawda jetekshi hám joqarı potencialǵa iye bolǵan jaslar ushın imkan jaratıp beriw maqsetinde Awıl xojalıǵı ministrligi hámde «Agrar taraw hayalları» associaciyasınıń baslaması menen ministrlik sistemasındaǵı 10 joqarı oqıw orınlarınıń student-jasları arasında «Jaslar hám innovaciyalıq awıl xojalıǵı» kórik-tańlawı ótkerildi. Usı kórik-tańlawdıń birinshi basqıshında jeńimpaz bolǵan komandalar Tashkent mámleketlik agrar universitetinde yarım final hám final basqıshında bellesti. Joqarı dárejede shólkemlestirilgen ilájda Oliy Majlisi Senatı aǵzaları, Evropa Awqamınıń Ózbekstandaǵı elshisi Sharlotta Adrian xanım, Awıl xojalıǵı ministrligi basshılları, «Agrar taraw hayalları» associaciyası wákilleri, Jaslar isleri agentligi, Joqarı oqıw orınlarınıń professor-oqıtıwshıları hám student-jasları qatnastı. Awıl xojalıǵı ministri Ibrohim Abdurahmonov ilájdı kiris sózi menen ashıp berib, usı tańlawdı ótkeriwden gózlengen tiykarǵı maqset student-jaslardı awıl xojalıǵı tarawında innovaciyalıq ideyalardı engiziwge tartıw hám olardıń bul baǵdardaǵı arzıw hám maqsetlerin ámelge asırıwdan ibarat ekenligin ayrıqsha atap ótti.

Jámi 3 basqıshta ótkerilgen tańlaw 4099 jaslardı qamtıp aldı. Tańlaw dawamında student-jaslar tárepinen jetekshi ideyalar tiykarında innovaciyalıq joybarlar inám etildi. Final qatnasıwshıları tóreshiler quramı aǵzalarına óz joybarlarınıń mazmunı hám áhmiyetin keń túsindirip, jeńimpazlıqtı qolǵa kirgiziw ushın bellesti. Quwanıshlısı, Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń «Keleshek jasları» komandası usı tańlawdıń yarım final basqıshında jeńimpaz dep tabıldı. Saltanatlı sıylıqlaw máresiminde filial student-jaslarına sıylı birinshi orındı iyelegenligi ushın I dárejeli diplom hám Evropaǵa sayaxat jollanbası tapsırıldı.
—Sahnada sıylıqlanǵan máwritlerimizde, qıyalımda biz jaslar ushın jaratılıp berilip atırǵan keń imkaniyatlardı jáne bir márte tereń sezindim— deydi studentimiz Shaxida Qarlıbaeva—bizler ustazlarımız hám komanda aǵzaları menen tınbay miynet etip, joybarımız ústinde jumıs alıp bardıq. Nátiyje bolsa kútilgeninen de zıyat boldı.
Filialdıń abıroyın jáne de arttıratuǵın usınday áhmiyetli jańalıqlardan birine úles qosqanımızdan quwanıshqa bólendik. «Nókis» xalıqaralıq aeroportında Evropaǵa sayaxat jollanbasın qolǵa kirgizgen Keleshek jasları» komandası saltanatlı túrde kútip alındı. Kútip alıw máresiminde filial direktorı A.Esimbetov basshılıǵında oqıtıwshılar, studentlerdiń ata-anaları hám dosları qatnasıp, jeńimpazlardı shın kewilden qutlıqlap, bunday unamlı tabıslar dawamlı bolıwın tiledi. Maǵlıwmat ornında, «Jaslar hám innovaciyalıq awıl xojalıǵı» kórik-tańlawınıń final basqıshında Tashkent mámleketlik agrar universitetiniń komandası ekinshi orındı, Ándijan awıl xojalıǵı hám agrotexnologiyalar institutı komandası bolsa úshinshi orındı iyeledi.