Senator student jaslar menen ushırastı
Usı kúnlerde senatorlar joqarı oqıw orınlarında bilim alıp atırǵan jaslar menen ushırasıp, ashıq sáwbetlesiwler ótkermekte. Usı jıldıń 13-iyun kúni Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında Ózbekstan Respublikası Oliy Majlisi Senatı aǵzası, Qaraqalpaqstan Respublikası kásiplik awqamları shólkemleri birlespesi Keńesi baslıǵı U.Jalmenov filial student-jasları menen ushırastı.
«Senator hám jaslar» ushırasıwın filial direktorı, professor A.Esimbetov kiris sózi menen ashıp berdi hám alıp bardı. Ilájda senator U.Jalmenov sózge shıǵıp, búgingi kúnde mámleketimiz xalqınıń derlik 60 payızınan aslamın quraytuǵın jaslar ushın jaratıp berilip atırǵan keń imkaniyatlar, ásirese olardıń sapalı hám zamanagóy bilim alıwı, iygilikli arzıw-maqsetlerin ámelge asırıw baǵdarında islenip atırǵan jumıslar haqqında toqtaldı.
— Sizler óz jelkeńizge Jańa Ózbekstandı qurıwday ullı wazıypanı kóterip júrgen baxıtlı jaslarsız— deydi U.Jalmenov—Siz jaslarǵa bildirilgen úlken isenimdi aqlaw jolında tınbay háreket qılıń, rawajlanıwdan toqtamań! Jetekshi baslamalardı ilgeri súrip, jańalanıwlarǵa qaray qádem taslań! Áne sonda unamlı nátiyjelerge erisesiz.
Alıp barılǵan sáwbetlesiw dawamında student-jaslarǵa parlament hám senatorlardıń iskerligi haqqında maǵlıwmatlar berip ótildi. Búgingi siyasıy processler, jaslardıń jámiyetimizde tutqan ayrıqsha ornı, olardıń tereń bilim alıwı menen birge siyasıy sawatlılıǵın jáne de arttırıp barıwı kerek ekenligi tuwralı sóz etildi. Senator student jaslar menen ómir jolı hám tájiriybelerin bólisti. Soraw-juwaplarǵa bay tárizde ótken ushırasıw student jaslarda ayrıqsha tásirlerdi qaldırdı.
Málimleme xızmeti
скачать dle 12.1
Telefon
E-mail
