Studentler hám máhálle jasları direktor kubogı ushın bellesti
Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında studentler hám «Gúlzar» MPJ jasları arasında sporttıń mini futbol túri boyınsha «Direktor kubogı» jarısı ótkerildi. Filialda bilim alıp atırǵan student-jaslardıń sportqa bolǵan qızıǵıwshılıǵın jáne arttırıw, sport tarawında iygilikli baslamaların qollap-quwatlaw, olar arasında salamat turmıs tárizin qáliplestiriw hámde sport penen shuǵıllanıwı ushın qolay shárt-sharayatlardı jaratıp beriw maqsetinde shólkemlestirilgen bul jarısta jámi 12 komanda direktor kubogı ushın bellesti.
Derlik 100 ge jaqın jaslar qamtıp alınǵan jarıs qızıqlı tásirlerge bay boldı. Komandalar awızbirshilikte jeńimpazlıqtı qolǵa kirgiziw ushın háreket qıldı. Jarıs jeńimpazların saltanatlı sıylıqlaw máresiminde filial direktorı A.Esimbetov, Qaraqalpaqstan Respublikası sport ministriniń orınbasarı A.Qalbaev, Ǵalabalıq sporttı rawajlandırıw bólimi baslıǵı I.Kudiyarovlar sózge shıǵıp, mámleketimizde ásirese jaslar arasında sporttı keń túrde en jaydırıw, olardı túrli sport jarıslarına tartıw arqalı bos waqıtların maqsetli shólkemlestiriw hám salamatlıǵın bekkemlewge qaratılıp atırǵan ayrıqsha itibar haqqında toqtalıp ótti.
“Direktor kubogı” jarısınıń juwmaqlawshı nátiyjelerine kóre, sıylı birinshi orınǵa «Turan» komandası ılayıq dep tabıldı hám direktor kubogınıń jeńimpazına aylandı. Ekinshi orındı «Terbenbes» iyelegen bolsa, «Gúlzar» MPJ jasları úshinshi orındı qolǵa kirgizdi. Jarıs jeńimpazları diplom hám bahalı sawǵalar menen sıylıqlandı.
Málimleme xızmeti
скачать dle 12.1
Telefon
E-mail
