SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Komitet wákili studentler turaq jayınıń qurılısı menen tanıstı

Áyne kúnlerde Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń oqıw binası aymaǵında studentlerdi turaq jay menen támiyinlew maqsetinde studentler turaq jayınıń qurılıs jumısları alıp barılmaqta.

Veterinariya hám sharwashılıqtı rawajlandırıw komitetiniń Pán hám bilimlendiriw tarawın rawajlandırıw basqarmasınıń baslıǵı A.Safarov filialǵa saparı sheńberinde may ayınan start alǵan studentler turaq jayınıń qurılısı menen jaqınnan tanıstı. Mámleketlik-jeke menshik sheriklik tiykarında 400 orınlı jataqxana qurılısı ámelge asırılmaqta. Usı processte isbilermenlik sub'ektleri menen baylanıs ornatılıp, jumıslar nátiyjeli alıp barılmaqta. Komitet wákili A.Safarov ob'ektte bolıp, qurılıs jumısların kózden keshirdi. Process boyınsha filial direktorı A.Esimbetov hám tiyisli juwapkerler menen sáwbetlesiw alıp bardı.

— Komitet basshılları filialda bilim alıp atırǵan studentlerdi qayǵıradı hám olarǵa qolay sharayatlar jaratıwǵa háreket qıladı— deydi A.Safarov — bunda tek ǵana olardıń sapalı bilim alıwı emes, bálkim, alıs wálayatlardan hám rayonlardan kelip tálim alıwdı maqset qılǵanlardı turaq jay menen támiyinlew máselesine de biyparıq emes. Sol sebepli, mine usınday iygilikli baslamanı ilgeri súrip, bilim alıwǵa qumar jaslarǵa quwanısh bólisiwdi maqset ettik.

Qurılıs jumısları menen tanısıw processinde jumıstı óz waqtında juwmaqlaw hám jaqsı sapaǵa ayrıqsha itibar qaratıw, student-jaslar ushın qosımsha sharayatlar jaratıw sıyaqlı máseleler dodalandı. Jańadan qurılıp atırǵan jataqxana 6 qabattan ibarat bolıp, 400 orınǵa mólsherlengen. Barlıq xanalar zamanagóy buyımlar menen támiyinleniwi rejelestirilgen.