Studentler ádebiy-ruwxıy hápteligi sheńberinde “Zakovat”ta bellesti
Nókis qalasındaǵı Nókis qalasındaǵı “Istiqlol” balalar dem alıw orayında Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı tárepinen ádebiy-ruwxıy hápteligi sheńberinde bir qatar aǵartıwshılıq ilájları ótkerilmekte.
Ilájlarda studentler tárepinen dóretiwshilik baǵdarındaǵı shıǵıwlar, milliy úrp-ádetlerimizdi hámde qádiriyatlarımızdı ózinde sáwlelendirgen kórgizbeler shólkemlestirildi. Búgin háptelik sheńberinde “Zakovat” intellektualıq oyını bolıp ótti. Zeyinli hám jaqsı logikalıq pikirlew qábiletine iye bolǵan student-jaslardı bir jerge jámlegen ilájda jámi 8 komanda qatnastı. Jaslar menen islesiw, ruwxıylıq hám aǵartıwshılıq bólimi baslıǵı A.Seytkamalov ilájdı kiris sózi menen ashıp berip, hámme komandaǵa áwmet tiledi. Ótkerilgen oyın studentlerde úlken qızıǵıwshılıq oyatıp, olarǵa pozitiv keypiyat bólisildi. Qatnasıwshılar bir-birinen qızıq bolǵan hám tereń pikir júritiwge baǵdarlaytuǵın sorawlarǵa juwap izlep, óz bilimlerin sınap kórdi.
Oyınnıń nátiyjelerine kóre, 3-kurs 310-topar studentlerinen jámlengen “Everest” komandası birinshi orındı qolǵa kirgizdi hám jeńimpazlar diplomı hám sawǵa menen sıylıqlandı. Sonday-aq, 3-kurs 302-topar studentleriniń “Qarekeń” komandası ekinshi orındı, 310-topar studentleriniń “Forever” komandası bolsa úshinshi orındı iyelep, diplom hám estelik sawǵaların qolǵa kirgizdi. Usı iláj student-jaslarda unamlı tásirlerdi qaldırdı. Olar waqıtın mazmunlı ótkeriw menen birge logikalıq pikirlew qábiletin rawajlandırıw imkanına iye boldı. Usı sıyaqlı ilájlar bilimdan studentlerdiń zeyinin jáne de ótkirlestiriw hám oylaw qábiletin keńeytip barıwda, hár tárepleme házirjuwap bolıp jetilisiwine xızmet qıladı dep oylaymız. Búgingi “Zakovat”ta bellesken studentler de usılardı atap ótti.
Málimleme xızmeti
скачать dle 12.1
Telefon
E-mail
