SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Pitkeriwshi kurs studentleri menen ashıq sáwbetlesiw alıp barıldı

Usı jıldıń 31-may kúni Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń pitkeriwshi kurs studentleri menen ashıq sáwbetlesiw alıp barıldı. Filial direktorı A.Esimbetov iláj basında sózge shıǵıp, bıyılǵı oqıw jılınıń juwmaqlanıwına da az waqıt qalǵanlıǵı, jáne sanawlı kúnlerden keyin pitkeriwshi kurs studentleriniń juwmaqlawshı mámleketlik attestasiya imtixanların tapsırıw processleri baslanıwı hám bul boyınsha kórilip atırǵan tayarlıqlar tuwralı toqtaldı.

–4 jıl dawamında studentlerge sapalı bilim beriw ushın bar kúsh hám imkaniyatımızdı jóneltirdik–deydi A.Esimbetov–joqtan bar qılıwǵa, teoriyalıq hám ámeliy bilimler úylesiwin támiyinlewge umtıldıq. Endi mine usı jaslar veterinariya hám sharўashılıq tarawınıń rawajlanıwına óziniń salmaqlı úlesin qosa aladı dep isenim bildiremiz. Bunnan soń, Veterinariya hám sharwashılıqtı rawajlandırıw komitetiniń Pán hám bilimlendiriw tarawın rawajlandırıw basqarmasınıń baslıǵı A.Safarov sózge shıǵıp, búgingi kúnde jáhánde veterinariya tarўında bilim alıp atırǵan bolajaq kadrlar eń kerekli qánigelerden biri ekeni, atap aytqanda, keyingi jıllarda mámleketimizde de veterinariya tarawında jaslardıń sapalı bilim alıwı ushın zárúr sharayatlar jaratılıp, olardıń bántligin támiyinlew boyınsha keń kólemli jumıslar alıp barılıp atırǵanlıǵı haqqında sóz etti. Ol óz shıǵıp sóylewinde veterinariya zamanagóy kásipler qatarına kiriwi, búgin taraw boyınsha jańasha jantasıw tiykarında alıp barılıp atırǵan reformalar nátiyjesinde tereń bilim hám tájiriybege iye qánigelerge bolǵan talap barǵan sayın artıp atırǵanı ayrıqsha atap ótildi. –Hár birimiz alatuǵın is haqımızdı ózimiz belgileymiz–deydi A.Safarov–yaǵnıy, óz potencialımızǵa, ózlestirgen bilim dárejemizge isensek. jumıssız qalmaymız.

Diplom qolǵa tiyiwden dárhál jumısqa jaylasıwǵa háreket qılıń áne sonda aldın tájiriybeńizdi arttırıp, ózińizdi jáne de rawajlandırasız. Sonıń menen birge pitkeriwshilerge abıroylı jumısqa jaylasıw tileginde bolǵanlar kóp miynet qılıwı, kózboyawshılıq artınan hasla húrmetke erisip bolmaytuǵını tuwralı óz másláhatlerin berip ótti. Komitet filial menen birgelikte taraw boyınsha jetik kadrlardı tayarlaw ushın bar kúsh hám imkaniyatın jumsap, ámeliy járdem kórsetiwge hár dayım tayar ekenin, usı iygilikli maqset jolında pikirlesip jumıs alıp barılıwı ayrıqsha atap ótildi. Pitkeriwshiler menen alıp barılǵan sáwbetlesiw dawamında studentler ózlerin qızıqtırǵan sorawlarǵa tolıq juwaplardı aldı. Maǵlıwmat ornında, bıyılǵı jılda filialdı 5 bilimlendiriw baǵdarı boyınsha jámi 359 student tamamlaydı. Sonnan, 88 i Zooinjeneriya (túrler boyınsha ) qánigeligi boyınsha, 55 si veterinariya laboratoriyası hám diagnostika isi qánigeligi boyınsha, 216 student bolsa veterinariya medicinası qánigeligi boyınsha bilim alıp atır.