SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Professordıń 60 jıllıq yubileyi múnásip belgilendi

Búgin Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń ilimiy isler hám innovaciyalar boyınsha direktor orınbasarı, awıl xojalıǵı ilimleri doktorı, professor Turganbaev Ruzimbay Urazbaevichtıń 60-jıllıq yubileyi belgilendi. Ilájda filial basshılları, Qaraqalpaqstan Respublikasi Veterinariya hám sharwashılıqtı rawajlandırıw komiteti wákili, professor-oqıtıwshılar, bólim xızmetkerleri hámde student-jaslar qatnastı. Filial direktorı, professor Adilbay Esimbetov iláj basında sózge shıǵıp, Ruzimbay Urazbaevichti búgingi tuwılǵan kúni menen qızǵın qutlıqlap, iygilikli tileklerin bildirip ótti.

Ol óz sózinde R.Turganbaevtıń filial shólkemlestirilgeninen baslap usı kúnge shekem ámelge asırıp kiyatırǵan unamlı jumısları, ilimiy potencialdı arttırıwda salmaqlı úles qosıp kiyatırǵanı, iygilikli baslamalardı ilgeri súriw qábileti hámde aǵla insanıy pazıyletleri haqqında ayrıqsha atap ótti. —Sizdi kóp jıllıq ómirin ilimge baǵıshlap, búgingi kúnde filial jumısı menen birge ilimiy jumıstıń teń salmaqlılıǵın saqlap kiyatırǵan, kóplegen shákirtlerdi tárbiyalap, olarǵa hám ilim jolında hám ómir jolında durıs baǵdar bere alǵan pidáyı insanlardan biri desek qátelespegen bolamız deydi —direktor A.Esimbetov. «Zooinjeneriya» kafedrasınıń oqıtıwshısı Z.Dawletova tárepinen R.Turganbaevtıń ómiri hám ilimiy iskerligi tuwralı bayanat oqıp berildi.

Bunnan soń, ilájda Qaraqalpaqstan Respublikasi Veterinariya hám sharwashılıqtı rawajlandırıw komiteti baslıǵınıń orınbasarı B.Qurbaniyazov, direktor orınbasarları, oqıtıwshılar hámde shákirtler sózge shıǵıp, professordıń filialdıń rawajlanıwına múnásip úles qosıw menen bir qatarda, ilim áleminde kóplegen shákirtlerdi tayarlaǵan húrmetli ustaz hám itibarǵa ılayıq insan ekenligin atap ótip, ózleriniń unamlı tileklerin bildirdi. Iláj juwmaǵında tuwılǵan kún iyesine sıy-húrmet kórsetilip, sawǵalar tapsırıldı. Pursattan paydalanıp, filialımızdıń professorı Turganbaev Ruzimbay Urazbaevichti 60 jıllıq yubileyi menen jáne bir márte shın kewilden qutlıqlaymız. Biz sizdi tek ustaz sıpatında ǵana emes, bálkim jaqsı hám kishipeyil insan sıpatında húrmetke bóleymiz! Siziń mánzilińizge eń iygilikli tileklerimizdi jollap qalamız.