SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

«Direktor kubogı»nıń jeńimpazları sıylıqlandı

Usı jıldıń 18-may kúni Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında professor-oqıtıwshılar hám xızmetkerler arasında sporttıń stol tennisi túri boyınsha «Direktor kubogı» jarısı ótkerildi. Kafedra oqıtıwshıları hám xızmetkerlerdiń fizikalıq belsendiligin jáne de asırıw, olardıń bos waqıtın mazmunlı ótkeriw hámde sportqa bolǵan qızıǵıwshılıǵın bunnan bılayda asırıw maqsetinde shólkemlestirilgen jarıs báseki hám tartıslarǵa bay boldı.

Jarıs dawamında 4 kafedra oqıtıwshıları hám xızmetkerler direktor kubogın qolǵa kirgiziw ushın óz-ara bellesti. Oyınǵa «Ekonomika hám gumanitar» pánler kafedrasınıń dene tárbiya oqıtıwshısı Q.Urazbaev tóreshilik qılıp bardı. Qızıqlı tásirlerge bay tárizde ótken jarıs dawamında oqıtıwshı hám xızmetkerler belsene qatnasıp, tırısqaqlıq kórsetti. Hámmege pozitiv keypiyat úlesildi.

Oyınnıń juwmaqlawshı nátiyjelerine bola er jigitler arasında ótkerilgen jarısta sıylı birinshi orındı “Veterinariya medicinası hám azıq-awqat qáwipsizligi” kafedrasınıń assistent-oqıtıwshısı S.Komiljonov qolǵa kirgizdi. 2-orındı xızmetkerlerden Z.Alewov iyelegen bolsa, 3-orın «Ekonomika hám gumanitar pánler» kafedrasınıń assistent-oqıtıwshısı E.Seytmuratov iyeledi. Hayal-qızlar arasında bolsa «Haywanlar anatomiyası, fiziologiyası hám bioximiyası» kafedrasınıń assistent-oqıtıwshısıB.Muratbaeva 1-orındı iyelep oyın jeńimpazına aylanǵan bolsa, usı kafedranıń jáne bir assistent-oqıtıwshısı Z.Ospanova 2-orındı iyeledi. Xızmetkerlerden K.Kojambergenovaǵa 3-orın nesip etti. Saltanatlı sıylıqlaw máresiminde filial direktorı Adilbay Esimbetov qatnasıp, bárshe jarıs qatnasıwshılarına minnetdarshılıq bildirdi hám jeńimpazlardı shın kewilden qutlıqladı. Jeńimpaz bolǵan qatnasıwshılar kásiplik awqamı shólkemi tárepinen sawǵalar menen sıylıqlandı. Jarıstıń tolıq jeńimpazlarına filial direktorı tárepinen «Direktor kubogı» tapsırıldı.