SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

«Jas programmistler» dógeregi aǵzaları jańa bilim hám kónlikpelerge iye bolmaqta

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında student-jaslardıń tiykarǵı oqıw shınıǵıwlarınan keyin bos waqıtların mazmunlı shólkemlestiriw hám bilimlerin bunnan bılayda bekkemlep barıw maqsetinde túrli dógerekler iskerligi jolǵa qoyılıp kelinbekte.

Atap aytqanda, «Ekonomika hám gumanitar pánler» kafedrası tárepinen studentlerdiń kompyuter texnologiyaları hám internetten durıs paydalanıw boyınsha sawatlılıǵın jáne de asırıw maqsetinde «Jas programmistler» dógeregi shólkemlestirilip usı taraw boyınsha jaslardıń bilimleri bekkemlenbekte. Dógerek baslıǵı B.Nasırov turaqlı túrde studentler menen birge islesip olarǵa bilim hám kónlikpelerdi berip barmaqta.

«Internet tarmaǵında málimleme qáwipsizligi» temasında alıp barılǵan dógerek shınıǵıwları dawamında studentlerge búgingi kúnde pútkiljáhán internet tarmaǵında málimleme qáwipsizligin jáne de jetilistiriw úlken áhmiyetke iye ekenligi, bul boyınsha mámleketimizde ámelge asırılıp atırǵan jumıslar, sociallıq tarmaqlardaǵı júzlegen qálbeki akkauntlar tárepinen tarqatılıp atırǵan tastıyıqlanbaǵan xabarlarǵa isenbew, internetten durıs paydalanıw, málimlemelerdi qalayınsha analizlew kerek ekenligi boyınsha tolıq maǵlıwmatlar berildi.

— Hesh kimge sır emes, búgingi málimleme-texnologiyalar ásirinde jaslardıń kompyuter texnologiyaları boyınsha sawatlılıǵın asırıw hámde IT boyınsha kerekli kónlikpelerge iye bolıwı ushın sharayat jaratıp beriw áhmiyetli — deydi ekonomika hám gumanitar pánler kafedrası P.Xojalepesov —sol sebepli usı dógerekti shólkemlestiriw arqalı studentlerdiń qızıǵıwshılıǵın jáne de arttırıp, olarda zárúr bilimlerin qáliplestirip barıw maqsetin gózledik. «Jas programmistler» dógeregi aǵzaları tema boyınsha kerekli maǵlıwmatlarǵa iye boldı.