SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Biz – sportshı shańaraqpız jarısında jeńimpazlıqtı qaysı shańaraq wákilleri qolǵa kirgizdi?

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında «15-may–Xalıqaralıq shańaraq kúni» múnásibeti menen «Biz – sportshı shańaraqpız» súreni tiykarında professor-oqıtıwshılar hám isshi-xızmetkerler, texnikum xızmetkerleri hám «Gúlzar» MPJ turǵınlarınıń shańaraq aǵzaları qatnasıwında sport jarısı ótkerildi. Sport ilájın filial direktorı A.Esimbetov kiris sózi menen ashıp berip, barlıq qatnasıwshılarǵa áwmet tiledi.

Filial hám texnikum xızmetkerleri hámde filialǵa biriktirilgen máhálle turǵınlarınıń bos waqıtın maqsetli shólkemlestiriw, olardı salamat turmıs tárizine ámel etiwge shaqırıw arqalı salamat báseki atmosferasın jaratıw, ózleri menen birge shańaraq aǵzaların da ǵalabalıq sportqa keń túrde tartıw hám sport shınıǵıwları menen jáne de shınıqtırıw maqsetinde ótkerilgen bul jarısta jámi 4 komanda qatnastı. Jarıs qatnasıwshıları qızıqlı hám tásirlerge bay bolǵan 5 shárt boyınsha bellesti. Iláj dawamında qatnasıwshılar awızbirshilikte ózleriniń epshilligin júzege shıǵarıwǵa tırıstı. Qızıqlı sport shınıǵıwların bejeriw dawamında bar sheberligin iske salıwǵa háreket qıldı.

— Xalıqaralıq shańaraq kúni bayramı qarsańında filial xızmetkerleri arasında shańaraq ushın arnalǵan sport jarısların ótkeriwdi dástúrge aylandırdıq —deydi Kásiplik awqamı shólkemi baslıǵı G.Kazaxbaeva—usı jılı qatarımızǵa texnikum hám «Gúlzar» máhállesiniń belsendilerin de qosıp atırmız. Bul arqalı bizler olardı hár túrli sport túrlerine qızıqtırıp, shańaraqta salamat ruwxıy ortalıqtı jaratıwǵa óz úlesimizdi qosıw sıyaqlı iygilikli maqsetti gózlegenbiz.
Bayram qarsańında baxıtlı shańaraqlar qatnasıwında ótkerilgen jarıstıń juwmaqlawshı nátiyjelerine kóre, texnikumnıń atınan qatnasqan Alimbetovlar shańaraǵı birinshi orındı iyelep, jeńimpaz boldı. Haywanlar anatomiyası, fiziologiyası hám bioximiyası kafedrasınıń atınan qatnasqan Primbetovlar shańaraǵı ekinshi orındı iylegen bolsa, tyutor Mambetniyazovlar shańaraǵına úshinshi orın nesip etti. Jarıs jeńimpazlarına diplom hámde bahalı sawǵalar tapsırıldı. Belsene qatnasqan komandalar da diplom menen sıylıqlandı. Áhmiyetlisi, qatnasqan shańaraq wákillerine shın mánisinde bayram keypiyatı úlesildi.