SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Franciya universitetiniń professorı filialǵa keldi

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialına Franciyanıń Aix-Marsel universitetiniń professorı Kamile Rhone-Quer keldi. Franciyalı miyman dáslep filial basshıları menen ushırasıp, direktor Adilbay Esimbetov penen sáwbetlesiw alıp bardı. Sáwbetlesiw dawamında Kamile Rhone-Querǵa filial tariyxı hám onıń búgingi kúndegi iskerligi, oqıw processi, studentler ushın jaratılǵan múmkinshilikler, áyne kúnlerde studentler turaq jayı qurılısına start beriliwi rejelestirilip atırǵanlıǵı boyınsha tolıq maǵlıwmatlar berildi.

Franciyalı professor filial menen birge islesiw memorandumın dúziw hám sol arqalı onı xalıqaralıq kólemde tanıtıw, aldaǵı waqıtta sheriklikti rawajlandırıp barıw, filialdıń abıroyın jáne de arttırıwǵa jaqınnan kómeklesiw, óz-ara paydalı is tájiriybesin almasıw hám birge islesiwdi keńeytiw sıyaqlı áhmiyetli usınıslardı bildirdi. Sonıń menen birge miyman veterinariya hám sharwashılıq tarawına qızıǵıwshılıǵı bar ekenligin atap ótip, áyne usı tarawda júz berip atırǵan jańalanıwlar menen tanısıw hám taraw boyınsha bilim alıp atırǵan studentler menen jaqınnan sáwbetlesiw alıp barıw tilegin bildirdi. — Men Qaraqalpaqstandaǵı haywanat dúnyası, olardıń jasaw sharayatı, ulıwma alǵanda veterinariya tarawı boyınsha maǵlıwmatlarǵa iye bolıwdı qáleymen—deydi Kamile Rhone-Quer —balıqshılıq tarmaǵı da meni qızıqtıradı.

Áyne usı taraw boyınsha studentlerge jetik bilim berip kiyatırǵan oqıw dárgayı hám onda bilim alıp atırǵan studentler tárepinen ilgeri súrilip atırǵan baslamalar menen jaqınnan tanısıp, sizler menen birge islesiwdi jolǵa qoyıw usınısı menen keldim. Alıp barılǵan sáwbetlesiw dawamında áhmiyetli máseleler dodalandı hám keleshekte paydalı birge islesiwdi keńeytiwge kelisip alındı. Bunnan soń Kamile Rhone-Quer filial májilisler zalında student-jaslar menen sáwbetlesiw alıp bardı.