SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

«Insan – áziz, eslew – muqqades» atamasında iláj ótkerildi

Búgin Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında 9-may – Eslew hám qádirlew kúni múnásibeti menen «Insan – áziz, eslew – muqqades» súreni tiykarında iláj ótkerildi. Ilájǵa filial basshılları, Ózbekstan «Veteran» urıs Ózbekstan “VETERAN” jawınger veteranlar hám mayıpları birlespesiniń Qaraqalpaqstan bólimi aǵzaları, Awǵan urısı qatnasıwshıları, napaqadaǵı leytenant O.Tóreniyazov hám napaqadaǵı mayor U.Allayarov, oqıtıwshılar hám student-jaslar qatnastı.

Filial direktorı A.Esimbetov ilájdıń kirisiw bóliminde Ekinshi jáhán urısında erisilgen jeńistiń 79 jıllıǵı múnásibeti menen jıynalǵanlardı qutlıqlap, búgin bizge berilgen inámler ishinde eń ullısı tınıshlıq ekenligi, urıstıń ayanıshlı elesleri bizlerdi búgingi tatıw turmısımızǵa shúkirlik keltiriwimizge tiykarǵı sebep ekenligi haqqında aytıp ótti. Iláj dawamında bolsa, keshe miymanları sózge shıǵıp, elimizdegi búgingi paraxat turmıstıń túp-tiykarında sawash maydanında watanı ushın janın pidá etken ata-babalarımızdıń mashaqatlı miyneti jatırǵanlıǵın, sonıń menen birge mámleketimizde urıs qatnasıwshıları hám miynet nuranıylarına kórsetilip atırǵan ayrıqsha ǵamqorlıq boyınsha sóz júritti.

Olar ózleriniń turmıs hám uzaq jıllıq is tájiriybesin student-jaslar menen bólisti. Iláj dawamında Ekinshi jáhán urısında bir yarım millionnan aslam ata-babalarımız sawash maydanında erlik kórsetip, jeńis ushın gúreskenligi hám olardıń yadı bizler ushın barlıq waqıtta áziz ekenligi haqqında ayrıqsha atap ótildi. Ilájdıń juwmaqlawshı bóliminde student-jaslar tárepinen urıs jılların hám jeńisti jırlawshı qosıqlar aytıldı. 9-may – Eslew hám qádirlew kúni múnásibeti menen ótkerilgen iláj student-jaslarımızdıń qálbinde búgingi tınısh hám paraxat turmısımızǵa shúkirshilik sezimin jáne bir márte oyata alǵanlıǵı anıq.