SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Filial jámááti bayram qarsańında nuranıy atanıń pátiyasın aldı

Elimizde hár jılı 9 may –Eslew hám qádirlew kúni bayramı qarsańında sáne múnásibeti menen kekse áwlad wákillerine ǵamxorlıq kórsetilip, sawash maydanında búgingi tınısh turmısımız ushın gúresip, qaytıs bolǵan watanlaslarımız esteligine húrmet kórsetiw hám nuranıylar halınan xabar alıw úrdiske aylanǵan.

Usı orında Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń miynet jámááti hám student-jasları I dárejeli «Mehnat faxriysi» kókirek belgisiniń iyesi, Ózbekstan Respublikasına xızmet kórsetken sharwa, Qaraqalpaqstan Respublikasına miyneti sińgen ilim ǵayratkeri B.Ábdirovtıń halınan xabar aldı.

Filial direktorı, A.Esimbetov hám xızmetkerler Buxarbay aǵa hám onıń shańaraq aǵzaların Ekinshi jer júzilik urısta erisilgen jeńistiń 79 jıllıǵı menen qutlıqlap, iygilikli tileklerin bildirdi hám nuranıy atanıń kóksine «Dańq lenta»sı taǵıldı. Kóp jıllar dawamında mashaqatlı hám hadal miynet etip, elimizdiń rawajlanıwına úles qosqan bul insanǵa qansha jaqsı táriyplerdi bersek, sonsha az boladı dep oylayımz. Buxarbay aǵa ózine kórsetilgen húrmet hám itibardan shadlıqqa bólenip, student-jaslar menen kóp jıllıq miynet jolı hám ómir tájiriybelerin bólisti.

— Sizlerdey bolajaq jas veterinar qánigelerdi kórip júdá quwanıp qaldım— deydi Buxarbay aǵa Ábdirov— elimizdiń ertengi, búgingiden de aydın turmısın sizler jaratasız. Meniń jasım, baxıtlı kekseligimdi sizlerge de tileymen. Men pák niyetlerim ámelge asıp uzaq jasap kiyatırǵan ǵárezsiz elimniń baxıtlı keseleriniń birimen. Sizler mennen de joqarı jetiskenliklerge erisiwińizge isenemen, óytkeni bunıń ushın barlıq imkaniyat esikleri ashıq turıptı.
Qaharmanımız jaslarǵa ilimiy iskerligi boyınsha tolıq aytıp berdi. Studentlerge búgingi páráwan turmısımızǵa mıńnan bir shúkir etip, bilimlerdi qunt penen ózlestiriwdi, iygilikli maqsetlerge qaray umtılıwdı másláhát etip ótti. Alıp barılǵan sáwbetlesiwden keyin nuranıy atamız qolların jaqsı niyet penen pátiyaǵa jayıp, elimiz tınısh, aspanımız ashıq bolıwın tilep, jaslarǵa óziniń pátiyasın berdi. Teberik jastaǵı ata ózine kórsetilgen húrmet hám itibardan minnetdar ekenligin bildirdi. Filial jámááti Buxarbay aǵaǵa bayram qarsańında sawǵa tapsırıp, pátiyasın aldı. Elimizge xızmet kórsetken usınday nuranıy atalaramız jaslarǵa shın mánisinde úlgi hám motivaciya bola aladı.