SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Pidáyı oqıtıwshınıń napaqa jasına tolıwı múnásip belgilendi

Búgin Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında «Haywanlar anatomiyası, fiziologiyası hám bioximiyası» kafedrasınıń assistent-oqıtıwshısı, Málimleme resurs orayı bólimi baslıǵı lawazımında islegen Xalmuratova Jumagúl Mafurovanıń dúnyaǵa kelgen kúni múnásibeti menen qutlıqlaw ilájı shólkemlestirildi.

Iláj basında filial direktorı A.Esimbetov sózge shıǵıp, búgingi tuwılǵan kún iyesiniń mánziline iygilikli tileklerin bildirdi. Direktor óz sózinde J.Xalmuratovanıń pidáyı, miynetkesh, belsene hám barqulla shólkemlestiriwshilik qábiletine iye, boyında aǵla pazıyletlerdi jámlegen jumısshı sıpatında atap ótip, onıń Málimleme resurs orayı bólimi baslıǵı lawazımında júdá nátiyjeli jumıs alıp barǵanın ayrıqsha aytıp ótti. Bunnan soń napaqa jasına tolıp atırǵan qaharmanımızdıń mánziline jıllı tilekler bildirildi. Iláj dawamında tuwılǵan kún iyesi ushın Málimleme xızmeti tárepinen tayarlanǵan arnawlı rolik qoyıp berildi hámde J.Xalmuratovanıń ómiri hám miynet iskerligi haqqında bayanat jasaldı. Keypiyat ushın jıynalǵanlarǵa stikerler bólistirilip, oǵan qaharmanımız Jumagúl apaǵa shıraylı táriypler jazıldı hám oqıp esittirildi.

Oqıw isleri boyınsha direktor orınbasarı Q.Atanazarov hám ilimiy xatker G.Eshmuratova ózleriniń qálemine tiyisli J.Xalmuratovaǵa arnalǵan qosıqların oqıp beriwi hámmeni tásirlendirdi. Ilájdıń eń kul'minaciyalıq noqatında bolsa filial jámááti tárepinen tayarlanǵan sawǵalar hám shıraylı gúller direktor A.Esimbetov tárepinen J.Xalmuratovaǵa saltanatlı túrde tapsırıldı. Filialdıń eń pidáyı, ashıq kewil hám hár iste belsene xızmetkeriniń napaqa jasına tolıwı múnásip belgilendi. Pursattan paydalanıp, pútkil filial jámááti jáne bir márte Jumagúl apanı shıng kewilden qutlıqlap, qálbimizdegi eń girbińsiz tileklerdi bildirip qalamız. Ilayım, hámiyshe mine usınday quwnaq keypiyat penen júriń, júzińizge jarasqan kúlki sizdi hesh qashan tárk etpesin. Tuwılǵan kún múbárek!