SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Qazaqstanlı professorlar tárepinen studentlerdiń bilimleri jáne de bekkemlenbekte

Búgingi kúnde joqarı bilimlendiriw tarawında studentlerdiń teoriyalıq bilimlerin jáne de bekkemlewde oqıw processine sırt el professor-oqıtıwshıların tartıw úlken áhmiyetke iye bolmaqta. Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında bul máselege unamlı jantasıw alıp barǵan halda ámeliy jumıslar shólkemlestirilmekte. Sırt el oqıtıwshıları qatnasıwında online lekciyalar ótkeriliwi menen birge qońısı mámleketlerdiń abıroylı oqıw orınlarınıń professorları studentlerge offline tárizde sabak beriwge tartılmaqta. Atap aytqanda Qazaqstan Respublikasınıń “QS World University Rankings” 500 ligine kiretuǵın Qazaqstan milliy agrar izertlew universiteti menen dúzilgen eki tárepleme shártnama tiykarında usı oqıw ornınıń «Biologiyalıq qáwipsizlik» kafedrasınıń professorı, veterinariya ilimleri kandidatı Mavlonov Amangeldi Zamanovich filial studentlerine 30 saat sabaq ótti.

Ol ámeliy saparınıń dáslepki kúninde filial direktorı, professor Adilbay Esimbetovtıń qabıllawında bolıp, sáwbetlesiw alıp bardı. Sáwbet dawamında birge islesiwdiń jańa basqıshları dodalandı. Jolǵa qoyılǵan oqıtıwshılar almasıwı tiykarında pedagog kadrlardıń tájiriybeleri jáne artıp, jańa bilimlerdi ózlestirip atırǵanlıǵı, óz-ara doslıq qatnasıqları jáne de bekkemlenip unamlı nátiyjeler berip atırǵanlıǵı atap ótildi. Keleshekte ilimiy qatnaslardı rawajlandırıw, studentler almasıwın jolǵa qoyıw boyınsha pikir hám usınıslar bildirildi.

Qazaqstanlı professor veterinariya diagnostikasi va laboratoriya isleri baǵdarında bilim alıp atırǵan 3-kurs studentlerine veterinariya tarawı boyınsha lekciya ótti. –Nókis qalasına saparımdı ekinshi márte ámelge asırdım– deydi A.Mavlonov – filialdaǵı kásiples oqıtıwshılar hám studentler menen jaqsı doslıq qatnasıqların ornatıp alǵanbız. Bul saparı lekciyalar dawamında filial studentleriniń bilim alıwǵa bolǵan umtılıwları jáne kúsheygenliginiń gúwası boldım. Eki mámleket joqarı bilimlendiriw tarawında nátiyjeli birge islesiwdi jolǵa qoyıp, iygilikli maqsetlerge qaray jedel adımlap atırǵanı álbette bizge úlken motivaciya baǵıshlamaqta. Bunnan aldın da Qazaqstanlı professorlar tárepinen studentlerge sabaq ótilgen edi. Student jaslar professordıń lekciyalarına belsene qatnasıp, bilim hám kónlikpelerge iye boldı. Maǵlıwmat ornında, áyne kúnlerde filialımızdıń «Zooinjeneriya» kafedrasınıń úlken oqıtıwshısı Z.Dawletova Qazaqstan milliy agrar izertlew universitetinde tájiriybe arttırmaqta.