SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

“IT hám jaslar ushırasıwı” ótkerildi

Usı jıldıń 9 aprel kúni Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń májilisler zalında “IT hám jaslar ushırasıwı” temasında iláj shólkemlestirildi. Usı ilájda Bizler Group IT kompaniyanıń tiykarshısı Q.Atabaev, oqıw bólimi hám Málimleme texnologiyalar bólimi xızmetkerleri hám student-jaslar qatnastı.

Oqıw isleri boyınsha direktor orınbasarı Q.Atanazarov ilájdı kiris sózi menen ashıp berip, jaslardı IT tarawına keń túrde qamtıp alıw búgingi kúnniń talabı ekenligi hám bul baǵdarda ámelge asırılıp atırǵan iygilikli jumıslar haqqında aytıp ótti. Bunnan soń Q.Atabaev sózge shıǵıp mámleketimizde keyingi jıllarda Prezidentimizdiń baslaması menen IT tarawın rawajlandırıwǵa ayrıqsha itibar qaratılıp, aymaqlarda IT-akademiyalar shólkemlestirilip, qábiletli jaslar ushın keń múmkinshilikler jaratılıp atırǵanlıǵı, jeke ózi de usı imkaniyatlardan únemli paydalanǵan halda taraw boyınsha jańalıqlardı jaratıp atırǵanlıǵı haqqında sóz etti.

Bul tarawǵa degen qızıǵıwshılıǵı hám usı tarawǵa kirip keliwi, umtılısları tuwralı aytıp berdi. Iláj dawamında studentlerge Bizler Group kompaniyasınıń maqseti hám búgingi kúndegi imkaniyatları, jetik bilimge iye bolǵan qánigeler, awızbirshilikli komanda menen birgelikte zamanagóy programmalastırıw boyınsha alıp barıp atırǵan jumısları hám erisilgen unamlı nátiyjeler haqqında qızıqlı maǵlıwmatlardı berip ótti. IT tarawında jumıs islew búgin jaslar arasında trendke aylanıp atırǵanı, Qaraqalpaqstanlı jaslar arasında da usı kásip arqalı dúnyanıń belgili kompaniyalarında jumıs islep tanılıp atırǵan jaslardı mısal retinde aytıp ótti. Ushırasıw IT tarawına qızıǵıwshılıǵı bar bolǵan zamanagóy jaslarǵa ájayip motivaciya baǵıshladı. Iláj miymanı studentler menen óziniń jumıs tájiriybelerin bólisti.