SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Studentlerge finanslıq sawatlılıq boyınsha túsinikler berildi

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında «Ekonomikalıq emes baǵdardaǵı joqarı bilimlendiriw shólkemlerinde jaslardıń finanslıq sawatlılıǵın asırıw» temasında ushırasıw bolıp ótti.

Usı ilájda Berdaq atındaǵı Qaraqalpaq mámleketlik universitetiniń finans kafedrasınıń docenti A.Juzbaev, «Ekonomika» fakultetiniń 3-kurs studentleri O.Smaylov, O.Radjabova, X.Jumamuratova, filial profilaktika inspektorı Q.Qayıpnazarov, studentler hám texnikum oqıwshıları qatnastı. Jaslar menen islesiw, ruwxıylıq hám aǵartıwshılıq bólimi baslıǵı A.Seytkamalov ilájdı ashıp berdi hám alıp bardı.
Ilájda sózge shıqqanlar, búgingi kúnde xalıqtıń finanslıq sawatlılıq dárejesin asırıw áhmiyetli másele ekenligi, bul baǵdarda ámelge asırılıp atırǵan is-ilájlar, finanslıq qáwipsizlik haqqında toqtalıp ótti. Qánigeler tárepinen student-jaslarǵa sanlı finanslıq sawatlılıq, insanlardıń finans tarawındaǵı bilim hám kónikpeleri, finanslıq sawatlılıq tiykarların jaqsı biliw real maqsetlerdi qoyıw hám olarǵa erisiw jolında isenim menen háreket qılıw imkanın beriw boyınsha túsinikler berildi. Sonıń menen birge aldawshılar tárepinen sociallıq tarmaqlarda túrli maqsetlerde plastik kartalarǵa pul taslap beriw sıyaqlı ámelge asırılıp atırǵan finanslıq aldawshılardan sergek bolıw zarúr ekenligi ayrıqsha atap ótildi. Studentler tema boyınsha tolıq túsiniklerge iye boldı.