SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Ullı sahıpqıran Ámir Temurdıń 688 jıllıǵına baǵıshlanadı

Usı kúnlerde orınlarda ullı sárkarda hám mámleketlik isker, sahıpqıran Ámir Temur tuwılǵanınıń 688 jıllıǵına baǵıshlanǵan túrli ruwxıy-aǵartıwshılıq ilájları shólkemlestirilmekte. Búgin Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında 9-aprel orta ásirdiń belgili ásker basshısı Ámir Temur tuwılǵanınıń 688 jıllıǵı múnásibeti menen «Sárkarda Ámir Temur ruwxıylıq hám aǵartıwshılıq qáwenderi» atamasında ushırasıw bolıp ótti. Usı ushırasıwda Ózbekstan Respublikası Din isleri boyınsha komitetiniń Qaraqalpaqstan Respublikası aymaqlıq basqarmasınıń bas qánigesi N.Jamalov, Qaraqalpaq mámleketlik universitetiniń tariyx ilimleri boyınsha filosofiya doktorı (PhD) N.Seytimbetova, filialdıń «Ekonomika hám gumanitar pánler» kafedrasınıń assistent-oqıtıwshısı N.Jamalov, oqıtıwshılar hám student-jaslar qatnastı. Jaslar menen islesiw, ruwxıylıq hám aǵartıwshılıq bólimi baslıǵı A.Seytkamalov ilájdı ashıp berdi hám alıp bardı.

Iláj basında Ámir Temurdıń ómir jolı, jetekshi basshı sıpatında xalıqtıń arzıw-úmitleriniń orınlanıwında óziniń úlken úlesin qosqan ullı sárkarda ekenligi, siyasat maydanına kirip keliwi haqqında aytıp ótildi. Ilájda sózge shıqqanlar tárepinen Ámir Temur babamız óz dáwiriniń qúdiretli mámleket tiykarın salıwshısı, ilim hám pán, mádeniyat hám aǵartıwshılıqtıń rawajlanıwına iygilikli úles qosqanlıǵı, tariyxta unamlı ózgerislerge sheshiwshi tásir kórsetip óz mórin qaldırǵanlıǵı atap ótildi. Iláj dawamında ullı babamızdıń ómiri, siyasıy hám áskeriy iskerligi, úlken batırlıǵı hám ǵayratı student-jaslarda tań qalıwshılıq hám háwes oyattı. Sárkarda Ámir Temurdıń yadı hámmemizdiń qálbimizge mórlengenligi jáne bir márte atap ótildi.