SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Filial studentleri pán olimpiadasında múnásip orınlardı iyeledi

Tayanısh oqıw ornımız bolǵan Samarqand mámleketlik veterinariya medicinası, sharwashılıq hám biotexnologiyalar universitetinde 5-aprelden start alǵan pán olimpiadalarınıń respublikalıq basqıshı joqarı dárejede ótkerildi. Usı olimpiada da filialdıń jámi 17 studenti qatnastı. 10 qánigelik pánlerden ótkerilgen pán olimpiadası eki basqıshta ótkerildi.

—Usı jılı Komitet baslıǵınıń baslaması menen birinshi márte ótkerilip atırǵan pán olimpiadalarında qatnasıw ushın «Zooinjeneriya» hám «Veterinariya medicinası hám azıq-awqat qáwipsizligi» kafedralarınıń oqıtıwshıları hám studentler menen Samarqand qalasına bardıq—deydi ilimiy isler hám innovaciyalar boyınsha direktor orınbasarı R.Turganbaev — Olar bizlerdi jaqsı kútip aldı. Studentlerimiz 10 qánigelik pánlerinen test sorawları hám ámeliy laboratoriya shınıǵıwların islep, bilimlerin sınap kórdi. Nátiyje jaman bolmadı. Aldaǵı waqıtta usınday pán olimpiadaların dástúriy túrde ótkerip barıw rejelestirilgenligi bizdi júdá quwandırdı.
Quwanıshlısı, eki kún dawam etken pán olimpiadasında filialdıń 10 studenti unamlı nátiyje kórsetip, 2 hám 3-orınlardı iyelewge eristi. — Samarqandtan Nókiske ájayip tásirler menen qayttıq—deydi 2-kurs studenti B.Bazarbaeva — olimpiadanıń ekinshi ámeliy laboratoriya shınıǵıwların islew dawamında ámeliy bilimlerimizdi jáne de bekkemlewimiz kerek ekenligin túsinip jettik. Universitet rektorı, professor X.Yunusov hámme jeńimpazlardı qutlıqlap, 16-aprel kúni Tashkent qalasında ótkeriletuǵın «Jaslar forumı»nda bárshe jeńimpazlar múnásip sıylıqlanıwın atap ótti.