SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

«Kitapqumar ana, kitapqumar bala» atamasında kórik-tańlaw ótkerildi

Prezidentimizdiń baslaması menen mámleketimizde jaslar arasında kitapqumarlıq mádeniyatın asırıp barıw boyınsha ámelge asırılıp atırgan jumıslardıń túp-tiykarında keleshegimizdiń jaratıwshıları bolǵan jaslardıń ilim alıwı hám jetik bilimli bolıwı sıyaqlı iygilikli maqset jatır. Balanı jaslıǵınan kitap oqıwǵa úyretiwde analardıń tutqan ornı girewli. Sol sebepli, búgingi kúnde orınlarda «Kitapqumar ana, kitapqumar bala» súreni tiykarında tańlawlar shólkemlestirilmekte. Atap aytqanda, usı jıldıń 6-aprel kúni Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında Hayal-qızlar máseleleri boyınsha direktor másláhatshisi G.Kazaxbaevanıń baslaması menen oqıtıwshı hám xızmetker hayallardıń perzentleri qatnasıwında «Kitapqumar ana, kitapqumar bala» atamasında kórik-tańlaw ótkerildi.

Jámi 4 shárt boyınsha ótkerilgen tańlawda 9 oqıtıwshı hám xızmetkerler 7-12 jas aralıǵındaǵı balaları menen qatnastı. G.Kazaxbaeva tárepinen berilgen ertek kitaplardı oqıp kelgen balajanlar, kitaptıń mazmunın ózleriniń mazalı tili menen aytıp berdi. Hámme shártler balalardıń talǵamına say árizde tańlanǵanı ushın tańlaw júdá pozitiv keypiyatta ótti. Tóreshiler aǵzalarınıń juwmaqlawshı nátiyjelerine kóre, 9-12 jas aralıǵındaǵı balalar arasında 1-orındı filial xızmetkeri N.Qádirimbetovanıń qızı G.Abdikalikova iyeledi. 2-orındı Z.Orazbaevanıń qızı A.Erxanova, 3-orındı G.Arzuovanıń qızı Q.Uzaqova iyeledi.

5-7 jas aralıǵında bolsa 1-orındı filial xızmetkeri J.Jalǵasbaevanıń perzenti M.Serikbaeva qolǵa kirgizgen bolsa, «Veterinariya medicinası hám azıq-awqat qáwipsizligi» kafedrasınıń oqıtıwshısı A.Kamalovanıń perzenti N.Xamidova 2-orındı, F.Arepbaevanıń qızı U.Qalillaeva 3-orındı iyeledi. Filial direktori A.Esimbetov tańlaw jeńimpazların qutlıqladı. —Shańaraqta perzent tárbiyasında analardıń tutqan ornı ayrıqsha ekenligin jaqsı bilemiz. Eger ana kitapqumar bolsa, perzentler álbette kitap oqıwǵa kewil bóledi. Balaǵa tek ǵana kitap oqı dep májbúrlew arqalı emes, hár bir ana bul iste eń aldı menen ózi órnek bolsa, nátiyje kútilgeninen de jaqsı boladı—deydi A.Esimbetov. Iláj juwmaǵında jeńimpaz balajanlarǵa diplom hám estelik sawǵası tapsırıldı.