SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Qazaqstanlı professor filial studentlerine online lekciya ótti

Búgin Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń student-jaslarına Qazaqstan Respublikasınıń “QS World University Rankings” 500 ligine kiretuǵın Qazaqstan milliy agrar izertlew universitetiniń “Sharwashılıq ónimlerin islep shıǵarıw texnologiyası” kafedrasınıń oqıtıwshısı, awıl xojalıǵı ilimleriniń kandidatı Serǵali Mırzaǵulov online lekciya ótti. «Awıl xojalıǵı haywanlarınıń selekciyası» temasında alıp barılǵan lekciya dawamında haywanlardıń genetikalıq belgileri hám olardı genetikalıq jaqtan úyreniw, olardı tártiplew, belgili jasaw sharayatlarına hám islep shıǵarıw texnologiyasına kóbirek iykemlesken haywanlardı saqlap qalıw, haywanlardıń násillerin hám mikroorganizmlerdiń shtammların jaratıw teoriyası hám ámeliyatı, haywanlar selekciyasınıń genetikalıq parametrlerine kiretuǵın kórsetkishler haqqında tolıq maǵlıwmatlar berip ótildi. Sabaq dawamında student-jaslarǵa tema sheńberinde qızıqlı maǵlıwmatlar berildi.

—“Zooinjeneriya” kafedrası hám Qazaqstan milliy agrar izertlew universiteti menen imzalanǵan memorandum tiykarında filialdaǵı oqıw processine jetekshi qánigelerdi qamtıw boyınsha birge jumıs alıp barıw, óz-ara baylanıslardı bekkemlew dawam etpekte. Búgingi shólkemlestirilgen online lekciya studentlerdiń teoriyalıq bilimleriniń jáne de bekkemleniwinde hám jańa kónlikpelerge iye bolıwında xızmet qıladı dep oylaymız —deydi “Zooinjeneriya” kafedrasınıń baslıǵı X.Mamatov. Lekciya juwmaǵında student-jaslar ózlerin qızıqtırǵan sorawlarǵa online tárizde juwap aldı. Maǵlıwmat ornında, Serǵali Mırzaǵulov bunnan aldın filialǵa kelip, studentlerge ofline tárizde sabaq ótken edi.