SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Jámiyette ideologiyalıq immunitetti bekkemlew temasında ushırasıw ótkerildi

Búgin Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń májilisler zalında "Jámiyette ideologiyalıq immunitetti bekkemlew" temasında ushırasıw bolıp ótti. Bul ilájda Ózbekstan Liberal – demokratiyalıq partiyası Qaraqalpaqstan Respublikalıq Keńesi Jaslar qanatı bólimi baslıǵı K.Xudaybergenova, Jaslar menen islesiw, ruwxıylıq hám aǵartıwshılıq bólimi baslıǵı A.Seytkamalov, «Veterinariya hám zooinjeneriya» fakulteti dekanı A.Kaniyazov, profilaktika inspektorı Q.Qayıpnazarovlar sózge shıǵıp, hár qanday xalıq hám milletiń birliginde milliy ideya áhmiyetli orın tutıwı, atap aytqanda, rawajlanıw jolında baratırǵan mámleketimizde de áyne usı másele úlken áhmiyetke iye ekenligi, buzǵınshı ideologiya hám ideyalarǵa qarsı unamlı ideyalar tiykarında gúres alıp barıwdı úgit-násiyatlaw áhmiyetli másele ekenligi haqqında toqtaldı.

Iláj dawamında student-jaslarǵa ideologiyalıq immunitet qalayınsha qáliplesiwi, ideologiyalıq hújimler hám olarǵa qarsı gúresiwde nelerge itibar qaratıw zárúr ekenligi, búgingi globallasıw dáwirinde buzǵınshı ideya hám ideologiyalar tásirine túsip qalmaw, olarǵa qarsı milliy ideya hám iygilikli arzıwlarǵa súyengen halda gúresiw kerek ekenligi tuwralı túsinikler berip ótildi.
K.Xudaybergenova ushırasıw qatnasıwshılarına sociallıq tarmaqlardaǵı zıyanlı ideya hám ideologiyalardı úgit-násiyatlaytuǵın rásmiy emes kanallardaǵı nadurıs maǵlıwmatlarǵa isenbewdi hám olardıń tásirine túsip, aldanıp qalmawdı, bunday materiallardan paydalanbawdı másláhát berip ótti. Sonıń menen birge temaǵa baylanıslı kerekli maǵlıwmatlar atap ótilip, tolıq túsinikler berildi. Iláj dawamında student-jaslar ideologiyalıq immunitet boyınsha tolıq túsiniklerge iye boldı.