SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Filialda Nawrız shadlıqları múnásip belgilendi

Ázelden xalqımızǵa ruwxıy kúsh-quwat berip kelgen, hámme ıntıqlıq hám saǵınısh penen kútip, shadlıqqa bólenip qarsı alatuǵın, kewilimiz gáwhári Nawrız áyyamınıń ájayip keypiyatı ele elimiz boylap gezip júripti. Atap aytqanda, Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında «Álem nurǵa tolsın seniń menen, Nawrız!» súreni astında bayram ilájı joqarı dárejede shólkemlestirildi.

Dáslep, iláj sheńberinde milliy taǵamlar kórgizbesi shólkmelestirilip, dasturxan milliy taǵamlar menen bezeldi. Kelgen miymanlar olardan dám tattı hám baha berdi. Student-jaslar arasında milliy oyınlar boyınsha jarıs ótkerildi. Ilájdıń kirisiw bóliminde filial direktorı A.Esimbetov hám Qaraqalpaqstan Respublikası Ministrler Keńesi Baslıǵınıń jaslar siyasatı, sociallıq rawajlandırıw hám ruwxıy-aǵartıwshılıq isleri boyınsha orınbasarı B.Ótemuratovlar sózge shıǵıp, bayram múnásibeti menen jıynalǵanlardı qutlıqlap, xalqımızdıń girbińsiz arzıw-úmitleri, iygilikli tilekleri hám pák sezimlerin ózinde sáwlelendirgen bul ullı áyyamdı múnásip tárizde belgileu úrdiske aylanǵanlıǵı, Nawrız jaslardı doslıq, insanıylıq, miyrim-shápáátli bolıw sıyaqlı iygilikli pazıyletlerge iye bolıwǵa shaqıratuǵın bayram ekenligi haqqında toqtalıp ótti.

Bayram keshesi filialdıń belgili «Qarekenshe online» komandası tárepinen tayarlanǵan qızıqlı koncert baǵdarlaması menen dawam etti. Úrp-ádet hám dástúrlerimizdi sáwlelendirgen sahnalı kórinisler, milliy libaslar kórgizbesi, baqsı hám jırawlar tárepinen atqarılǵan qosıqlar hámmege unamlı keypiyat baǵıshladı. Ásirese ózbek, qazaq hám qaraqalpaq xalıqlarınıń úrp-ádetleri tiykarında bet ashardıń janlı tárizde aytılǵanı jıynalǵanlardıń alǵısına miyassar boldı. Filialda Nawrız bayramı ájayip shadlıq penen múnásip belgilendi.