SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Haywanlardı identifikaciya etiw hám dizimge alıw tártibi temasında seminar ótkerildi

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında «Awıl xojalıǵı haywanların identifikaciya etiw hám dizimge alıw tártibi» temasında seminar ótkerildi. Ilimiy isler hám innovaciyalar boyınsha direktor orınbasarı R.Turganbaev seminardı kiris sózi menen ashıp berip, keyingi jıllarda mámleketimizde veterinariya hám sharwashılıq tarawın jedel rawajlandırıw hámde tarawda xızmet qılıp atırǵan qánigelerdiń ámeliy bilimlerin jáne de bekkemlep barıwǵa ayrıqsha itibar qaratılıp atırǵanlıǵı, respublikamız rayonlarındaǵı fermer xojalıqlarında xızmet kórsetip atırǵan veterinar qánigeler ushın shólkemlestirilip atırǵan usı seminardıń maqsetine ayrıqsha toqtalıp ótti.
Dáslep, seminar qatnasıwshılarına Ózbekstan Respublikası Ministrler Kabinetiniń 2023-jıl 29-dekabrde qabıl etilgen «Haywanlardı identifikaciya etiw, dizimge alıw hám baqlaw sistemasınıń tártip-proceduraları jetilistirilgenligi múnásibeti menen Ózbekstan Respublikası húkimetiniń ayrım qararlarına ózgeris hám qosımshalar kirgiziw haqqında»ǵı qarardıń mazmunı hám mánisi túsindirildi.

Bayanatshılar «Zooinjeneriya» kafedrasınıń assistent-oqıtıwshıları R.Aytjanov, A.Nametovlar tárepinen haywanlardı identifikaciya etiwdiń maqseti hám nátiyjeleri, VIS-HAMSA sisteması arqalı maǵlıwmatlar almasıwı, haywanlardı identifikaciya etiwdiń azıq-awqat qáwipsizligindegi ornı haqqında tolıq maǵlıwmatlar berildi. Tıńlawshılarǵa haywanlardı identifikaciya etiwdiń atributları, birkani ornatıwda tiykarınan nelerden paydalanılıwı haqqında túsinikler berip ótildi. Seminar dawamında qatnasıwshılarda tema boyınsha tolıq túsinikler payda boldı. Respublikamız rayonlarındaǵı fermer xojalıqlarında xızmet kórsetip atırǵan veterinar qánigeler ushın shólkemlestirilip atırǵan usı seminar 2 kún dawamında alıp barıladı.