SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Filialda súmelek seyili joqarı keypiyatta ótkerilmekte

Sanawlı kúnlerden keyin Nawrız bayramı jaqınlasıp kelmekte. Áyne házir Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında bayram múnásibeti menen súmelek seyili bolıp ótpekte.

Búgin filial jámááti úlken qazan átirapında toplanıp, qálbindegi eń girbińsiz tileklerin bildirdi. Bir tárepte qazanda súmelek qaynasa, basqa tárepte bayram palawı tayarlandı. Hámme milliy libaslarda júdá kóterińki keypiyat penen bayram atmosferasın jarattı desek asıra aytqan bolmaymız. Filialdıń «Qarekenshe online» komandası bolsa milliy bayramda milliyligimizdi jáne de sáwlelendiriw maqsetinde qazan átirapında qaraqalpaq milliy úrp-ádetlerin ózinde jámlegen sahnalı kórinislerdi atqarıp, oyınǵa tústi.
Filial direktorı Adilbay Esimbetov oshaq basında búgingi súmelek seyili awızbirshilikte shólkemlestirilip atırǵanlıǵı, milliy bayramımız múnásip tárizde belgilenip atırǵanlıǵınan quwanıshlı ekenligin bildirdi. Jası úlkenler qazan basında toplanıp, pátiya berdi. Hámme usı kúnlerge saw-salamat jetkeregni ushın shúkirshilik etip, qazanda qaynap atırǵan súmelek basında iygilikli tileklerin bildirdi. Usı tárizde hámmege joqarı bayram keypiyatı bólisildi.