SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Direktor jaslar menen sáwbetlesti

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı direktorı, biologiya ilimleri doktorı, professor Adilbay Esimbetov qatnasıwında «Direktor hám jaslar» ushırasıwı bolıp ótti. Bul ushırasıwda direktor ziyrek, belsene studentler menen ushırasıp, ashıq sáwbetlesiw alıp bardı. Alıp barılǵan sáwbetlesiw dawamında studentlerdi qıynap atırǵan túrli mashqalalar, olar erisip kiyatırǵan tabıslar, ziyrek studentlerdiń túrli tańlaw hám joybarlarda qatnasın támiyinlew hám oqıw processine baylanıslı máseleler tuwralı sóz etildi. —Hár bir insan ómirde óz jolın ózi tańlaydı. Jaqtı keleshegin oylaǵan jaslar ilim-aǵartıwshılıq jolınan baradı—deydi direktor Adilbay Esimbetov, —Óytkeni, jaqsı bilim hám potencialǵa iye bolıw, tek ǵana diplom ushın emes úlken maqsetler hám parlaq keleshek ushın bilim alıw hár bir jas ushın áhmiyetli qádem bolıp esaplanadı.
Biz sizlerge tek ǵana jolbasshı wazıypasın ótep beremiz, óz ornıńızǵa hám úlken tabıslarǵa bolsa óz umtılıwlarıńız, hadal miynetińiz hám álbette iyelegen tereń bilimlerińizdiń esesine erisesiz. Alıp barılǵan sáwbetlesiw dawamında direktor studentlerge zaman menen teń qádem basıw, intellektuallıq potencialdı jáne de rawajlandırıp barıw, til úyreniw, óz ústinde tınbay izleniwde bolıw sıyaqlı temalarda óz másláhatlerin berip ótti. Student-jaslar túrli jónelisler boyınsha óz usınısların ilgeri súrdi. Atap aytqanda, usı «Jaslar hám biznesti qollap-quwatlaw jılı»nda óz qánigeliginen kelip shıǵıp, óz biznesin jolǵa qoyıw hám filialdaǵı teńleslerin de usı bizneske qamtıp alıw arqalı olardı jumıs penen támiyinlew sıyaqlı áhmiyetli usınıslar bildirildi.

Filial direktorı studentlerdiń hár bir iygilikli baslamasın qollap-quwatlawdı hám imkan dárejesinde ámeliy járdem kórsetiwdi ayrıqsha atap ótti. Ushırasıwda studentlerge erkin atmosfera jaratılıp, olar ózleriniń pikir hám usınısların bildirdi.