SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Qırǵızstan Respublikası Osh mámleketlik universiteti menen unamlı birge islesiw dawam etedi

Búgingi kúnge kelip Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı qońsı mámleketlerdiń abıroylı Joqarı oqıw orınları menen unamlı birge islesiwdi jolǵa qoyıp kelmekte. Atap aytqanda Qırǵızstan Respublikası Osh mámleketlik universiteti menen dúzilgen shártnama tiykarında «Zooinjeneriya» kafedrasınıń baslıǵı, awıl xojalıǵı ilimleri boyınsha filosofiya doktorı(PhD) X.Mamatov ámeliy sapar menen Qırǵızstanǵa bardı.

Osh mámleketlik universitetiniń wákilleri menen bolıp ótken ushırasıw dawamında óz-ara sheriklik hám doslıq baylanısların bunnan bılayda bekkemlew, professor-oqıtıwshılardıń tájiriybe almasıwın jolǵa qoyıw, sheriklikte dual bilimlendiriwdi engiziw, studentler ushın akademiyalıq almasıwdı jolǵa qoyıw, iri ilimiy joybarlar ústinde birgelikte jumıs alıp barıw, veterinariya hám sharwashılıq tarawı boyınsha jańalıqlardı jaratıw, boyınsha sáwbetlesiw alıp barıldı. Sapar sheńberinde nókisli oqıtıwshılar Osh mámleketlik universitetinde studentler ushın jaratılǵan sharayatlar menen jaqınnan tanıstı. Atap aytqanda, oqıw xanaları, laboratoriyadaǵı zamanagóy ásbab-úskeneler, ádebiyatlar menen támiyinlengen kitapxanada bolıp, qırǵızstanlı studentler menen ashıq sáwbetlesiw alıp bardı.

— Qırǵızstanǵa birinshi saparım unamlı tásirlerge tolı boldı. Osh mámleketlik universiteti menen sheriklik qádemi veterinariya hám sharwashılıq tarawındaǵı baylanıslardı bunnan bılayda keńeytiw múmkinshiligin beredi. Universitet wákilleri menen bul boyınsha sóylesiwlerdi alıp bardıq. Bul jerdegi atmosfera maǵan júdá unadı. Men ózim Samarqand qalasınan Nókiske barıp islep atırman, qırǵızstanlılarda nókisliler sıyaqlı ashıq hám miymandos ekenine gúwa boldım. Bul jerde úyrengen tájiriybelerimdi filial oqıtıwshıları menen bólisip atırman—deydi X.Mamatov.

Bul sapar dawamında eki tárep ushın da paydalı jónelisler boyınsha sóylesiwler alıp barıldı. Birge islesiwde anıq wazıypalar belgilep alındı. Maǵlıwmat ornında, bunnan aldın Qırǵızstan Respublikası Osh mámleketlik universitetiniń professorı, awıl xojalıǵı ilimleriniń doktorı Abdugani Abdurasulov filialǵa kelip, studentlerge sabaq ótti.