SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Lider hayal menen ushırasıw

Keyingi jıllarda mámleketimizde gender teńlikti támiyinlewge ayrıqsha itibar qaratılıp, Hayal-qızlardıń jámiyetimizdegi ornı hám statusı barǵan sayın artıp barmaqta. Bunıń nátyijesinde bolsa, mámleket basqarıwındaǵı hayallardıń sanı da kóbeymekte. Student-jaslarǵa búgingi kúnde Hayal-qızlarǵa qaratılıp atırǵan itibar haqqında túsinikler beriw hám aramızdaǵı lider hayallardıń ómiri hám tájiriybesi menen jaqınnan tanıstırıw maqsetinde orınlarda «Basshı hayal imidjin jaratıw» temasında sáwbetlesiwler ótkerilmekte. Búgin Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında da usı tema boyınsha ushırasıw bolıp ótti. Ilájda Ózbekstan Respublikası Jazıwshılar awqamı aǵzası, «Doslıq» ordeni iyesi, shayıra G.Dawletova, Hayal-qızlar máseleleri boyınsha direktor másláhatshisi G.Kazaxbaeva, Málimleme-resurs orayı bólimi baslıǵı J.Xalmuratova, professor-oqıtıwshılar hám student qızlar qatnastı. G.Kazaxbaeva iláj basında sózge shıǵıp, jámiyetimizdegi belsene hayallar hám házirgi kúnde mámleketlik shólkemlerde 2 mıńǵa hayallar basshıllıq etip atırǵanlıǵın atap ótti. Iláj dawamında G.Dawletova óziniń ómiri hám miynet jolı, dóretiwshilikke dáslepki qádemleri hám basshı hayal imidjin qalay jaratıw kerek ekenligi boyınsha oziniń mektep direktorı iskerliginen kelip shıǵıp aytıp berdi.
— Hár qanday kúshli hám aqıllı hayaldı ápiwayılıq bezeydi. Kishipeyilligimiz bizdi jáne de shırayǵa bóleydi. Eger usı qásiyetlerdiń teń salmaqlılıǵın uslap bilsek, haqıyıqıy lider hayalǵa aylanamız. Men ómirden, átirapımdaǵı insanlardan motivaciya alaman. Jasım úlkeygeni sayın ózimdi ele de tárbiyalap baraman hám sizlerge de sonı másláhat etemen—deydi G.Dawletova. Sáwbetlesiw júdá mazmunlı bolıp ótti. Shayıra apamız student-qızlar menen óz tájiriybelerin bólisti. Olarǵa turmısta kerek bolatuǵın másláhatlerdi berdi. Qaharmanımız tek ǵana qábiletli shayır emes, bálkim qaraqalpaqtıń júdá ápiwayı hám sada, kishipeyil hám aqıllı, haqıyqıy lider hayalı ekenine jáne bir márte isenimimiz kámil boldı.