SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Jadidlerdiń ideyaları hám arzıw-niyetleri búgingi siyasatımızda óz kórinisin tappaqta..

Prezidentimiz tárepinen jadidshilik háreketiniń wákilleriniń elimiz rawajlanıwı hám mádeniyatınıń ilgerilewi jolında ámelge asırǵan jumısların xalqımız, ásirese jaslar arasında keń túrde úgit-násiyatlawǵa ayrıqsha itibar qaratılmaqta. Búgingi kúnde orınlarda bul ilgeri súrilgen iygilikli baslama tiykarında úgit-násiyat ilájları shólkemlestirilmekte. Atap aytqanda Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında«Jadidlerdiń milliy mánawiyat rawajlanıwına qosqan úlesi» atamasında ushırasıw bolıp ótti.

Usı ilájda filial basshılları, Qaraqalpaqstan Jazıwshılar awqamınıń ádebiy másláhatshisi Seydin Amirlan, Respublika Ruwxıylıq hám aǵartıwshılıq orayı “Ma'rifat” úgit-násiyatshılar jámiyeti aǵzası, shayır Rawaj Otarbaev hám student-jaslar qatnastı. Filial direktorı A.Esimbetov ilájdı kiris sózi menen ashıp berip, Prezident járdemshisi Saida Mirziyoyevanıń tómendegi pikirlerin keltirip ótti: «Jadidlerdiń ideyaları, olardıń arzıw-niyetleri Prezident Shavkat Mirziyoyevtiń siyasatında óz kórinisin tappaqta, desek haqıyqat bolıp esaplanadı». Iláj dawamında ushırasıw miymanları sózge shıǵıp, elimiz rawajlanıwı jolında janın pidá etken babalarımızdıń ómiri hám iskerligine, olar tárepinen ámelge asırılǵan iygilikli jumıslardıń tiykarǵı mánisine toqtaldı. Jadid babalarımızdıń xalıq arasında milliy mádeniyattı rawajlandırıw, olardıń pikirlew qábiletin hám dúnyaqarasın keńeytiw, sociallıq-siyasıy hám mádeniy-aǵartıwshılıq boyınsha jańalanıwlardı ámelge asırıw sıyaqlı iygilikli baslamalardı ilgeri súrgenin atap ótti.

Olar tárepinen tek ǵana er balalar emes, qızlardı da mekteplerde oqıwǵa qamtıp alıw, oalrdı jetik tárbiyalı hám ilimli insan sıpatında kámalǵa keltiriw áhmiyetli ekenligi belgilep alınǵanlıǵı boyınsha tolıq túsiniklerdi berdi. Sonıń menen birge jıynalǵanlarǵa usı jıldıń birinshi kúninen baslap Prezidentimizdiń baslaması menen “Jadid” gazetası baspadan shıǵıp baslaǵanlıǵı maǵlıwmat sıpatında aytıp ótildi hám usı gazeta betlerin paraqlaǵanda jadid babalarımız tárepinen ámelge asırılǵan iygilikli jumıslar hám olardıń atqarǵan xızmetleri boyınsha keń maǵlıwmatlarǵa iye bolıwımız múmkin ekenligi atap ótildi. Ushırasıw student-jaslarda unamlı tásirlerdi qaldırdı.