SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Sırtqı bólim studentleri menen sáwbetlesiw alıp barıldı

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń sırtqı bóliminde búgingi kúnde jámi 239 student bilim alıp atır. Olar ushın sabaq processleri belgilengen grafik tiykarında alıp barıladı. Atap aytqanda, 1-kurslar ushın oqıw shınıǵıwları 8 yanvar sánesinen baslanǵan bolsa, 2-kurslar ushın búgin yaǵnıy 15 yanvar kúninen baslandı.

Oqıw isleri boyınsha direktor orınbasarı Q.Atanazarov hám «Veterinariya hám zooinjeneriya» fakulteti dekanı A.Kaniyazov sırtqı bólim studentleri menen sáwbetlesiw alıp bardı. Sáwbetlesiw dawamında oqıw processi, studentlerdiń sabaqlarǵa qatnası hám kontrakt tólemleri boyınsha sóz júritildi. Sırtqı bólim studentlerine kontrakt tólemlerin óz waqtında tólew boyınsha eskertiwler berildi. Ushırasıw dawamında barlıq tiyisli máseleler dodalandı.

Student-jaslar ózlerin qızıqtırǵan sorawlarǵa juwap aldı. Filialdıń sırtqı bóliminde bilim alıp atırǵan studentlerdiń de pikir hám usınısları turaqlı túrde úyrenilip barıladı. Olardıń sapalı tálim alıwları ushın qolaylı sharayatlar jartılıp kelinbekte. Sáwbetlesiw dawamında pikir hám usınıslar tıńlandı.