SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Filialdıń er jigitlerine haqıyqıy bayram keypiyatı bólisildi

Qurallı Kúshlerimiz dúzilgeniniń 32 jıllıǵı hám 14-yanvar – Watan qorǵawshıları kúni múnásibeti menen Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń Hayal-qızlar jámááti tárepinen filialdıń er jigitler miynet jámááti ushın saltanatlı bayram ilájı shólkemlestirildi. Atap aytqanda, búgin erte tańnan baslap barlıq professor-oqıtıwshılar, student jigitler, xızmetkerler usı bayramnıń gimnine aylanǵan «Leytenant» qosıǵınıń jańlawı astında múnásip kútip alındı.

Bayram ilájınıń ekinshi bólimi filial májilisler zalında dawam etti. Filial direktorı Adilbay Esimbetov ilájdı kiris sózi menen ashıp berip, saltanatlı bayram menen tarawdıń barlıq wákillerin hám filial jámáátin qızǵın qutlıqlap, óziniń iygilikli tileklerin bildirdi. Bunnan soń, filialdıń «Qarekenshe online» komandası tárepinen tayarlanǵan ájayip koncert baǵdarlaması qoyıp berildi. Iláj dawamında filial Hayal-qızlar jámááti tárepinen bayram qaharmanlarına haqıyqıy bayram keypiyatın bólisiw maqsetinde biri birinen qızıqlı viktorinalar ótkerildi, jeńimpazlarǵa hám belsene qatnasqanlarǵa sawǵalar berildi.

Bayram inámi hám házili sıpatında er jigitler jámááti qızıqlı hám kútilmegen nominaciyalar menen sıylıqlandı. Janlı hawazda atqarılǵan qosıqlar, zawıqlı ayaq-oyınlar, qızıqlı viktorinalar hám kútilmegen syurprizlerge bay tárizde ótkerilgen iláj hámmege quwnaq keypiyat baǵıshladı. Bayram juwmaǵında Hayal-qızlar tárepinen tayarlanǵan sawǵalar saltanatlı túrde tapsırıldı.
Er jigitler jámááti kásiples Hayal-qızlardıń baslaması menen shólkemlestirilgen bayram ilájında zawıqlı atmosferanı sezindi.