Bas nızamımız qabıl etilgenliginiń 31 jıllıǵı menen direktor qutlıqlawı

Usı jılı  Bas nızamımız-Ózbekstan Respublikası Konstituciyasınıń qabıl etilgenliginiń 31 jıllıǵın  “Konstituciya — xalıqshıl mámleket, turaqlı rawajlanıw hám abadan turmıstıń tiykarı” súreni astında ayrıqsha quwanısh penen belgilep atırmız. Usı ájayip sáne múnásibeti menen xalqımızdı, pútkil filial jámáátin shın kewilden qutlıqlayman. 2023 jıl 30 aprel- bul kún mámleketimizdiń tariyxı  betlerinde ayrıqsha sáne  bolıp mórlenip qaldı.   Áyne usı kúni referendumda ulıwmaxalıqlıq dawıs penen qabıl qılınǵan jańa redakciyadaǵı Ózbekstan Respublikası Konstituciyası mámleket hám jámiyet turımısın modernizaciyalaw hám mámlekette konstituciyalıq nızamnıń ústemligin bunnan bılayda bekemlew ushın huqıqıy tiykar boldı. Jańa redakciyadaǵı Ózbekstan Respublikası Konstituciyası shın mánisinde xalqımızdıń Konstituciyasına aylandı. 

Ótken 31 jıl dawamında Ózbekstan Respublikası Konstituciyası xalqımızdıń abadanlıǵı, rawajlanıwımızdıń huqıqıy tiykarı hám barlıq tarawdaǵı reformalardıń huqıqıy baǵdarı bolıp xızmet qıldı. Bul tariyxıy áhmiyetli hújjet jáhán kóleminde múnásip orın iyelewimiz hám bizlerdiń tınısh, abadan turmıs keshiriwimiz ushın bekkem fundament wazıypasın atqarıp kelmekte. Bizler átiramızǵa dıqqat penen názer salıp qarasaq, xalqımızdıń qálbindegi qáterjamlıq hám shúkirshilik sezimi kózlerinde sáwlelenip turǵanın kóriwimiz múmkin. Bunıń tip-tiykarında hár bir puqaranıń huqıq hám erkinlikleri nızam menen kepillengenligi jatır. Erkin turmıs keshirip atırǵanımızdı hár bir alıp atırǵan nápesimizde seziniwimiz bizler ushın ullı baxıt dep oylayman. Búgin mámleketimizde jedellik penen alıp barılıp atırǵan izshil reformalar jarqın keleshegimizge qaray qoyılǵan batıl qádem bolıp tabıladı. Bas nızamımız bolsa rawajlanıw jolındaǵı barlıq is-háreketlerimizdiń unamlı nátiyjesin támiyinlep beredi. 

Konstituciya xalıqımızdıń baxıtlı jasawı ushın imkan jaratıp beredi hám onıń huqıqıy kepilligi bolıp sanaladı. Xalıq hám jámiyet ústem bolǵan mámleket puqarası ekenligimiz bizge jáne de kúsh-ǵayrat baǵıshlaydı. Búgingi barlıq háreketlerimiz insan qádirin arttırıwǵa qaratılǵan, Bas nızamǵa kirgizgen barlıq ózgerislerdiń negizinde de mámleketimizde alıp barılıp atırǵan reformalardı mazmun-mánisin belgilep beriwshi “Insan qádiri ushın” ullı ideyasınıń jatırǵanlıǵı bárshemizge málim. Pursattan paydalanıp, gúllán xalqımızdı jáne bir márte ullı áyyyamımız-Ózbekstan Respublikası Konstituciyasınıń qabıl etilgenliginiń 31 jıllıǵı menen qızǵın qutlıqlayman. Nızam ústem bolǵan jámiyette turmıs keshirip atırǵanlıǵımız hám onıń bir bólegi ekenimiz benen qanshama maqtansaq, sonshama arzıydı. Sonıń menen birge hár birimiz jelkemizdegi juwapkershilik sezimin tereń sezingen halda, mámleketimizde alıp barılıp atırǵan reformalarǵa ózimizdiń iygilikli úlesimizdi qosıwǵa tırısıwımız kerek. Tınısh hám abadan turmısımız dawamlı bolsın!

Húrmet penen,

filial direktorı, biologiya ilimleri doktorı, professor Esimbetov Adilbay Tlepovich