SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Qaraqalpaq tiline mámleketlik til biyligi berilgenliginiń 34 jıllıǵı joqarı dárejede belgilendi

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında qaraqalpaq tiline mámleketlik til biyligi berilgenine 34 jıl tolıwı múnásibeti menen «Mártebeń bálent bolsın, ana tilim!» atamasındaǵı bayram ilajı bolıp ótti.

Ilaj basında Ózbekstan hám Qaraqalpaqstan Respublikalarınıń mámleketlik gimnleri jańladı. Jaslar menen islesiw, ruwxıylıq hám aǵartıwshılıq bólimi baslıǵı A.Seytkamalov ilájdı ashıp berdi hám ullı bayram— 1 dekabr – Qaraqalpaqstan Respublikası «Mámleketlik til haqqında»ǵı nızamı qabıl etilgeniniń otız tórt jıllıǵı menen bársheni qızǵın qutlıqlap ótti. Onnan soń Qaraqalpaqstan xalıq jazıwshısı, filologiya ilimleriniń kandidatı A.Abdiev, Ózbekstan hám Qaraqalpaqstan Jazıwshılar awqamınıń aǵzası, shayır R.Otarbaevlar sózge shıǵıp, Ana tilimiz xalqımızdıń tariyxın, turmıs tárizin hám milliy ózligin ózinde jámlegen biybaha baylıq ekenligi, onı qásterlew hám húrmet etiw bárshemizdiń perzentlik parızımız bolıp sanalıwı haqqında atap ótti. Sonday-aq iláj dawamında keyingi jıllarda qaraqalpaq tilin rawajlandırıwǵa ayrıqsha itibar qaratılıp, bul baǵdarda nátiyjeli jumıslar ámelge asırılıp atırǵanlıǵı, ásirese jaslardı ana tilinde taza sóylewge úgit-násiyatlaw áhmiyetli ekenligi boyınsha bahalı pikirler bildirildi. Usı jılı “Qaraqalpaq tiliniń túsindirme sózligi” tórt tomlıq kitabınıń mobil qosımshası islep shıǵılǵanlı ayrıqsha atap ótildi. Saltanatlı bayram ilájı filialdıń qábiletli student jaslarınan dúzilgen «Qarekeńshe onlayn» komandası tárepinen tayarlanǵan ájayip koncert baǵdarlaması menen dawam etti. Qız-jigitlerdiń milliy ayaq oyınları, baqsı hám jırawlardıń shıǵıwları, qaraqalpaq milliy qosıqlarınıń janlı tárizde atqarılıwı, ásirese «Ziywar» atlı tariyxıy kórkem filminen alınǵan sahnalı kórinisler bárshe tamashagóylerdi ayrıqsha tásirlendirdi. Qaraqalpaq tiline mámleketlik til biyligi berilgenine 34 jıl tolıwı múnásibeti menen ótkerilgen ilájhár jılǵıdan da joqarı dárejede ótkerildi.